Maliyyə

Ana səhifə

Maliyyə

Neft Fodunun vəsaitlərinin idarə olunmasından 0% gəlir proqnozlaşdırılıb, proqnozdan -5,2% kənarlaşma olub

19 iyun 2023 20:55 (UTC +04:00)

Azərbaycan Respublikası Dövlət Neft Fondunun 2022-ci ildə vəsaitlərinin idarə olunmasından əldə edilən gəlirlər ilkin olaraq 1,7% və ya 1 216,8 mln. manat proqnozlaşdırılıb, lakin sonradan dürüstləşmiş büdcədə gözlənilən gəlirlilik 0% olaraq müəyyənləşdirilib.

APA-nın xəbərinə görə, bu, Hesablama Palatasının “Azərbaycan Respublikasının Dövlət Neft Fondunun vəsaitlərinin formalaşdırılmasının və əsas istiqamətlər üzrə istifadəsinin auditi” üzrə aparılmış kənar dövlət maliyyə nəzarəti tədbirinin nəticələrinə dair auditor hesabatında əksini tapıb.

Qeyd edilib ki, 12 aylıq icra göstəricilərinə əsasən ARDNF-nin aktivlərinin bazar dəyərində qısamüddətli qiymət dəyişkənliklərindən yaranan 2 461,3 mln. ABŞ dolları (və ya -5.2%) azalma müşahidə olunub. 2022-ci il üzrə ARDNF-in investisiya portfelinin aktivlər üzrə gəlirliliyi aşağıdakı cədvəldə verilib.

2022-ci il üzrə ARDNF-in investisiya portfelinin aktivlər üzrə gəlirliliyi.

Maliyyə aktivi / Alt-portfel*	Fərdi gəlirlilik	Portfeldə çəkisi*	Ümumi gəlirlilikdə payı
Borc öhdəlikləri və pul bazarları	-3,8%	61,9%	-2,4%
Səhmlər	-16,7%	19,7%	-3,3%
Daşınmaz əmlak	9,2%	6,3%	0,5%
Qızıl**	-	12,1%	-
Toplam	-5,2%		-5,2%

Gəlirliliyin hesablanması məqsədi ilə hər bir maliyyə aktivi ona aid bank hesabları ilə birgə götürülüb.

**Qızıl alt-portfelinin gəlirliliyi yalnız “məzənnə dəyişikliyindən yaranan fərq” komponentinin tərkibi kimi hesablanır. Məlum olduğu kimi, ARDNF-nin qızıl yatırımları strateji məqsədlər istiqamətində həyata keçirilib və qızıl külçələr şəklində əldə edilən bu ehtiyatlar hal-hazırda ARDNF-nin xüsusi saxlancında saxlanılmaqdadır.

Portfelin böyük hissəsinin sabit gəlirli aktivlərə yatırım edilməsinə baxmayaraq diversifikasiyanın təmin olunması ilə bağlı səhm, özəl səhm, daşınmaz əmlak və qızıl kimi aktivlərə yatırım edilməsi, eləcə də qeyd olunan aktivlər daxilində sektor, region, müxtəlif investisiya növləri və valyutaları üzrə bölünməsi gəlirlilik üzrə təsdiq edilmiş proqnozlaşdırmalarda əhəmiyyətli kənarlaşma ilə (0-5,2%) nəticələnib.