Maliyyə

Ana səhifə

Maliyyə

«Bank of Baku» Qafqaz Universitetində «Maliyyə və mühasibat uçotu laboratoriyası» təsis edib

24 iyun 2013 08:29 (UTC +04:00)

Bakı – APA-Economics. Qafqaz Universitetində «Bank of Baku» ASC-nin «Maliyyə və mühasibat uçotu laboratoriyası»nın rəsmi açılışı olub. Laboratoriya bankın dəstəyi ilə istifadəyə verilib. Bankdan «APA-Economics»ə verilən məlumata görə, bank və universitet rəhbərliyinin qatıldığı açılış mərasimində tələbə və müəllimlər də iştirak ediblər.

Tədbirdə «Bank of Baku»nun İdarə Heyətinin sədri Fərid Hüseynov müasir dünyada təhsilin mühüm rolundan danışaraq laboratoriyadan müəllim, mütəxəssis və tələbələrin səmərəli istifadə edəcəklərinə əminliyini vurğulayıb.

Öz növbəsində Qafqaz Universitetinin rektoru, professor Ahmet Sanıc rəhbərlik etdiyi ali məktəbdə təhsilin inkişafı üçün reallaşdırılan tədbirlərdən söz açıb.

Laboratoriya müasir avadanlıq, həmçinin ACCA, CIMA, CFA və digər proqramlar üzrə çap və elektron resurslarla təchiz edilib. Burada müvafiq proqramlar üzrə seminarlar da keçiriləcək. Müasir tələblərə cavab verən yüksəkixtisaslı mütəxəssislərin hazırlanmasında laboratoriyanın əhəmiyyətli rolu olacaq. Laboratoriya Qafqaz Universitetinin iqtisadiyyat fakültəsinin tələbələrinin istifadəsinə verilib. Burada dərslər universitetin professor və müəllim heyəti tərəfindən tədris olunacaq. Laboratoriyada kompüterlər quraşdırılıb və otaq ən müasir elektron lövhə ilə təchiz olunub.

Qeyd edək ki, «Bank of Baku» ilə Qafqaz Universiteti arasında ötən ilin noyabr ayında əməkdaşlıq sazişi imzalanıb. Sənədin əsas məqsədi bankın bilik və təcrübəsinin universitetdə istifadəsinə və ali məktəb tələbələrinin bankın fəaliyyətinə cəlb edilməsinə nail olmaqdır. Müqavilə çərçivəsində hazırda Universitetdə tədris alan 11 tələbəyə bank tərəfindən aylıq stipendiya ayrılıb.