Maliyyə

Ana səhifə

Maliyyə

Azərbaycanda manat pul kütləsi 23% artıb

13 may 2013 10:47 (UTC +04:00)

Bakı. Vahab Rzayev – APA-Economics. Azərbaycanda geniş mənada pul kütləsinin (M3 aqreqatı) həcmi 2013-cü ilin aprelin 1-nə 16 863,7 mln. manat təşkil edib ki, bu da 2012-ci ilin müvafiq dövrü ilə müqayisədə 2 543,8 mln. manat və ya 17,8% çoxdur. Azərbaycan Mərkəzi Bankından “APA-Economics”ə verilən məlumata görə, o cümlədən bu ilin yanvar-mart aylarında geniş mənada pul kütləsi 88,4 mln. manat və ya 0,5% artıb.

Qeyd edək ki, M3 aqreqatın strukturuna banklardan kənarda nağd pullar, tələb olunanadək və müddətli əmanət və depozitlər daxildir.

Pul kütləsinin M2 aqreqatı (manat pul kütləsi) son bir ildə 2 574,0 mln. manat və ya 22,9% artaraq 13 837,4 mln. manata çatıb:

(mln. AZN)

	01.04.2012	01.01.2013	01.01.2013
M0 (nağd pullar)	7 241,3	9 256,6	8 999,2
M1 (nağd pul, tələb olunanadək əmanət və depozitlər)	8 996,9	11 107,9	10 982,8
M2 (nağd pul, tələb olunanadək və manatla müddətli əmanət və depozitlər)	11 263,4	13 806,4	13 837,4
M3 (nağd pul, tələb olunanadək və müddətli əmanət və depozitlər)	14 319,9	16 775,3	16 863,7

Göründüyü kimi, son bir il ərzində nağd manat kütləsi 1 757,9 mln. manat və ya 24,3% artıb. Beləliklə, manat pul kütləsinin artımının 68,3%-i nağd pulların artımının payına düşüb.

Ölkədə nağdlaşma səviyyəsi bu ilin aprelin 1-nə 65,0%-ə bərabər olub ki, bu da illik müqayisədə 0,7 faiz bəndi çoxdur.

Qeyd edək ki, 2010-2011-ci illərlə müqayisədə manat kütləsinin artım tempi müəyyən qədər azalıb. Belə ki, 2010-cu ildə artım 34,5%, 2011-ci ildə 32,5%, 2012-ci ildə 25,6% təşkil edib.