MDB

Ana səhifə

MDB

Ukraynada jurnalistin qətlinə görə axtarışda olan general həbs olunub

22 iyul 2009 08:50 (UTC +04:00)

Bakı – APA. Ukraynada jurnalist Georgi Qonqadzenin qətlinə görə axtarışda olan general Aleksey Pukaç həbs olunub. APA-nın “İnter” telekanalına istinadən xəbərinə görə, general ölkənin Jitomir vilayətində ələ keçib. Onu xüsusi mühafizə altında Kiyevə gətiriblər. Ukrayna Baş Prokurorluğu faktı təsdiqləyib.
Qeyd edək ki, “Ukrainskaya pravda” internet nəşrinin baş redaktoru G.Qonqadze 2000-ci ildə qətlə yetirilib. İstintaqın versiyasına görə, o vaxt Ukrayna DİN-in Baş Cinayət Axtarışı İdarəsinin rəisi olan general A.Pukaç jurnalistin izlənməsinə və oğurlanmasına rəhbərlik edib, sonda isə G.Qonqadzeni öz əlləri ilə boğub. 2003-cü ildə onu “Ukrainskaya pravda”nın baş redaktorunun izlənilməsinə dair sənədləri məhv etmək ittihamı ilə həbs ediblər. Az sonra bu, başqa yerə getməmək qəti-imkan tədbiri ilə əvəzlənib. Elə o vaxtdan A.Pukaç yoxa çıxıb. 2005-ci ildə Ukrayna prezidenti Viktor Yuşşenko Qonqadze cinayətinin açıldığını elan etdikdən sonra generala qarşı qətl ittihamı irəli sürülüb və onun barəsində beynəlxalq axtarış elan olunub.
Qeyd edək ki, G.Qonqadzenin qətlinə görə Ukrayna DİN-in zahiri müşahidə və kriminal kəşfiyyat departamentinin əməkdaşları Nikolay Protasov, Valeri Kostenko və Aleksandr Popoviç müvafiq olaraq 13, 12 və 12 il müddətinə azadlıqdan məhrum ediliblər. Onlardan heç biri özlərini tam təqsirli bilməyiblər. Üstəlik, cinayətin sifarişçisi də müəyyənləşdirilməyib. Ukrayna prezidentinin mühafizə xidmətinin rəhbəri Nikolay Melniçenko qətldə o vaxtkı prezident Leonid Kuçmanı ittiham edərək ortaya audiolent çıxarsa da, lentdəki səsin Kuçmaya məxsus olduğu təsdiqlənməyib.