MDB

Ana səhifə

MDB

Gürcüstanın elm və təhsil naziri Microsoft şirkətinin nümayəndələri ilə görüşüb

29 yanvar 2010 22:06 (UTC +04:00)

Tiflis. Nizami Məmmədzadə-APA. Bu gün Gürcüstanın elm və təhsil naziri Dmitri Şaşkin Microsoft şirkətinin nümayəndələri ilə görüşüb. APA-nın Gürcüstan bürosunun məlumatına görə, görüşdə Gürcüstanda fəaliyyət göstərən məktəblərdə kompüter tədrisinin gücləndirilməsi məsələsi müzakirə olunub.

Görüşdə qeyd olunub ki, 2010-cu ildə Gürcüstanda məktəblərin 75%-i internetlə təmin olacağı və layihənin Gürcüstan prezidenti Mixail Saakaşvilinin təşəbbüsü ilə həyata keçirildiyi vurğulanıb.

Tədbirdə vurğulanıb ki, Gürcüstanda fəaliyyət göstərən məktəblərin 2011-ci ildə internetlə təmin edilməsi başa çatacaq. Qeyd olunub ki internetdən istifadənin qiymətini dövlət ödəyəcək. Layihə çərçivəsində hər bir məktəbin internet saytı olacaq. Ən maraqlısı odur ki, belə saytların yaradılmasında bilavasitə məktəblilər iştirak edəcək.

Tədbirdə qeyd olunub ki, Microsoft şirkəti Gürcüstan təhsil sistemi üçün lisenziyalı proqramlar tərtib edib. Görüşdə yeni texnologiya ilə zənginləşdirilmiş məktəb mühitinin yaradılması üçün məsələlər müzakirə olunub.

Gürcüstanın elm və təhsil naziri APA-ya bildirib ki, məktəblərin kompüterlərlə təmin edilməsi, təhsil ocaqlarının dünya internet şəbəkəsinə qoşulması həm şagirdlərin, həm də müəllimlərin təcrübələrinin zənginləşməsi və bilik səviyyəsinin artmasına imkanlar yaradacaq.

Hal-hazırda Gürcüstanda 2171 məktəb 26.800 kompüterlə təmin olunub. Eyni zamanda görüşdə qeyd olunub ki, kompüter fənninin tədrisi lazımi səviyyədə deyil. Buna baxmayaraq təhsil və elm nazirliyinin istəyi və prezidentin təşəbbüsü ilə qısa bir vaxt ərzində bu sahədə uğurlar əldə ediləcək.