MDB

Ana səhifə

MDB

Tiflisdə 31 Dekabr-Dünya Azərbaycanlılarının Həmrəylik Gününə həsr olunan tədbir keçirilib

26 dekabr 2011 22:47 (UTC +04:00)

Tiflis. Nizami Məmmədzadə-APA. Gürcüstan paytaxtında Gürcüstan Azərbaycanlılarının Konqresinin təşkilatçılığı və Akkord şirkətlər qrupunun maliyyə dəstəyi ilə 31 Dekabr-Dünya Azərbaycanlılarının Həmrəylik gününə həsr edilən tədbir keçirilib. APA-nın Gürcüstan bürosunun məlumatına görə, tədbiri Konqresin sədri Hüseyn Yusubov açaraq 31 Dekabr-Dünya Azərbaycanlılarının Həmrəylik Günü tarixi barədə tədbir iştirakçılarına məlumat verərək tədbirə gələn Gürcüstanın dövlət adamlarına, xarici ölkə səfirliklərinin təmsilçilərinə, QHT nümayəndələrinə, ziyalılara, tələbələrə, Tiflisdən və onun ətraf bölgələrindən gələn qonaqlara təşəkkürünü bildirib. H.Yusubov çıxışında Azərbaycan və Gürcüstanın qardaş və dost ölkə olduğunu , eyni zamanda separatizmdən birgə əziyyət çəkdiklərini vurğulayıb. “Bu gün Azərbaycan və Gürcüstan birgə həmrəy olmalıdır. Ona görə ki, həm bizim vətənimiz olan Gürcüstanın, həm də milli dövlətimiz olan Azərbaycanın ərazi bütövlüyü pozulub, torpaqları işğal olunub, hər iki ölkə separatizmdən əziyyət çəkir. Bu gün separatizm Qafqaza qan gətirir. Bu gün biz ona görə həmrəy olmalıyıq ki, separatizmə qarşı birgə mübarizə aparaq. Biz güclü olmalıyıq ona görə ki, Azərbaycan-Gürcüstan-Türkiyə birlikdə böyük layihələr həyata keçirirlər. Bu layihələr bəzi ölkələrin heç də ürəyincə olmadı. Bu dövlətlərin birliyi və gücü möhkəm olarsa, hər üçü qüdrətli dövlət olar. Biz qüdrətli və bir olmağı bacarmalıyıq. Mən hamıya sülh arzulayıram. Ümid edirəm ki, Azərbaycan və Gürcüstanın həmrəy olması nəticəsində digər problemlər də həll olunacaq.”
Sonra tədbirdə Kvemo-Kartli bölgə qubernatoru David Kirkitadze çıxış edərək Dünya Azərbaycanlılarının Həmrəylik Günü ərəfəsində Gürcüstan prezidenti Mixail Saakaşvilinin imzaladığı fərmanla Azərbaycanın Diasporla İş üzrə Dövlət Komitəsinin sədri Nazim İbrahimovun “Şərəf” ordeni ilə təltif olunduğunu bildirib. Bölgə qubernatoru David Kirkitadze eyni zamanda Kvemo-Kartli bölgə qubernatorunun müavini Hüseyn Yusubovun da. III dərəcəli “Vaxtanq Qorqasali” ordeninə layiq görüldüyünü qeyd edib və ordeni H. Yusubova təqdim edib. Tədbirdə Gürcüstan Milli Təhlükəsizlik Şurası katibinin müavini Tamar Kintsuraşvili,Bolnisi Rayon İcra Hakimiyyətinin müavini Ramin Əsədova “Şərəf ” ordeni təqdim edib.
Tədbirdə 17 nominasiya üzrə bir çox QHT təşkilatlar “2011-ci ildə ilin ən yaxşı təşkilatı” və Gürcüstanda fəaliyyət göstərən “Sokar”, “Akkord” və ”Embawood” şirkətlərinin nümayəndəlikləri “İlin ən yaxşı şirkəti” nominasiyasına və KİV təmçilçilərindən - Az.TV (Gürcüstan üzrə müxbir Şahismayıl Şəmmədoğlu) və Türksel telekanalları “İlin ən yaxşı telekanalı” və Gürcüstanda nəşr olunan Azərbaycan dilli “ZİYA” qəzeti (təsisçi Gürcüstan Azərbaycanlılarının Ziyalılar Birliyi, baş redaktor Nizami Məmmədzadə) və “Sözün işığında” qəzeti (təsisçi Rustavi Azərbaycanlılarının Mədəniyyət Mərkəzi, baş redaktor Əziz Dəlivəlli) və “Qarapapaqlar” jurnalı (təsisçi Marneulidə fəaliyyət göstərən Azərbaycanlıların Mədəniyyət Mərkəzi, baş redaktor Akif Xansultanov), “Uğur” adlı din jurnalı “2011-ci ilin ən yaxşı Azərbaycan dilli qəzeti və jurnalı” nominasiyası diplomları ilə təltif olunublar. Tədbirdə Gürcüstan reinteqrasiya məsələləri üzrə dövlət nazirinin Kvemo-Kartli bölgəsi üzrə müşaviri Savalan Mirzəyev bölgədə azərbaycanlıların gürcü cəmiyyətinə inteqrasiyasında göstərdiyi xidmətlərə görə “2011-ci ilin ən yaxşı dövlət adamı” nominasiyasına layiq görülüb. Sonra Azərbaycanlıların Mədəniyyət Mərkəzinin nəzdində fəaliyyət göstərən “Sarvan” folklor rəqs ansamblı da “İlin ən yaxşı ansamblı” nominasiyası ilə mükafatlandırılıb. Tədbirdə gürcü ali təhsil ocaqlarında təhsil alan tələbələr də “İlin ən yaxşı tələbəsi” nominasiyalarına layiq görülüblər.
Tədbirdə Azərbaycan və Türkiyə səfirliklərinin nümayəndələri, TİKA-nın təmsilçisi, Gürcüstan prezident aparatının müşaviri Mübariz Qarayev, parlament deputatı Azər Süleymanov, qəzet redaktorları və Marneuli, Bolnisi, Dmanisi icra hakimiyyətinin müavinləri və fəalları iştirak ediblər. Sonda Azərbaycan və gürcü dillərində mahnılar və rəqslər ifa edilib.