MDB

Ana səhifə

MDB

Moskvanın əsas aeroportunu «kiborqlar» qoruyacaq

04 fevral 2012 10:27 (UTC +04:00)

Bakı. Nicat Mustafayev – APA-Economics. Moskvanın «Domodedovo» aeroportunda təhlükəsizlik xidməti əməkdaşları daimi gəzdirilən kameralarla təchiz olunacaq.

«APA-Economics»in Rusiya mətbuatına istinadən verdiyi məlumata görə, aeroportda reallaşdırılan layihə «Kiborq» («Cyborg») adını daşıyır. Hava limanının təhlükəsizlik xidməti əməkdaşları tərəfindən daimi gəzdirilən kameralar səs və videonu yaza biləcək. Kameranın yaddaşına köçürülənlər daha sonra nəzarətçilər tərəfindən öyrəniləcək. Layihənin 2012-ci il ərzində reallaşması nəzərdə tutulur.

«Domodedovo» aeroportunda gözlənilən daha bir yenilik «Ağıllı hasar» («Smart Fence») layihəsidir. Layihəyə əsasən, hava limanında perimetr üzrə kameralar, hərəkət sensorları və vibrasiyanın daxil olduğu müşahidə sistemi quraşdırılacaq. Hazırda «Ağıllı hasar»ın uzunluğu 10 km, limanın perimetri isə 20 km təşkil edir. Sözügedən işlər cari ilin sonunadək başa çatdırılacaq.

Bundan başqa, uçuş-enmə zolağı istisna olunmaqla, aeroport ərazisi texnoloji «Wi-Fi»la əhatə olunacaq. Ona daxil olma imkanları isə yalnız hava limanının əməkdaşları üçün mümkün olacaq. Belə ki, onlar bu yolla rəhbərliyin göstərişlərini alacaq. Sərnişinlər isə aeroportun terminalında mobil operatorların təqdim etdiyi pulsuz «Wi-Fi»dan istifadə edə biləcək.
Bununla yanaşı, «Domodedovo» aeroportunda videomüşahidə sistemi modernləşdiriləcək. Yeni sistem hava limanının müxtəlif istiqamətlərində quraşdırılmış 15 min kameranı birləşdirəcək ki, bu da şəklin daha aydın və dəqiqliklə ötürülməsinə imkan verəcək. Bu sistem yalnız təhlükəsizlik məqsədi daşımayacaq. O, eyni zamanda sərnişinlərə yüksək xidmət göstərilməsinə yardım edəcək. Məsələn, operator sərhəd nəzarəti üçün növbələrin yaranmasını müşahidə edərsə, dərhal əlavə kabinlərin açılması göstərişini verəcək.

Qeyd edək ki, «Domodedovo» aeroportu sərnişin daşımalarına görə Rusiyanın ən iri hava limanıdır. Belə ki, 2011-ci il ərzində aeroportda sərnişin axını 25,7 mln. nəfər təşkil edib. Rusiyanın digər hava limanlarından fərqli olaraq, «Domodedovo» dövlətə deyil, investorlara məxsusdur. Ötən ilin dekabr ayında sözügedən hava limanı satışa çıxarılıb.

Domodedovo