MDB

Ana səhifə

MDB

Tiflisdə Qafqaz xalqlarının folkloru və lingvokulturologiyası mövzusunda beynəlxalq elmi simpozium keçirilir

18 aprel 2012 21:27 (UTC +04:00)

Tiflis. Nizami Məmmədzadə-APA. Aprelin 18-də İ.Cavaxişvili adına Tiflis Dövlət Universitetində (TDU) “Qafqaz xalqlarının folkloru və lingvokulturologiyası” mövzusunda Beynəlxalq Elmi Simpozium başlayıb. APA-nın Gürcüstan bürosunun məlumatına görə, tədbirdə İ. Cavaxişvili adına TDU-nun rektoru Aleksandr Kvitaşvili, TDU-nun Qafqazşünaslıq İnstitutunun direktoru Tsira Baramidze, Azərbaycan Milli Elmlər Akademiyasının Folklor İnstitutunun şöbə müdiri Füzuli Bayat, Ərdahan universitetinin professoru Orxan Söyləməz, Suxumi Dövlət Universitetinin rektoru Coni Akakidze,Valeh Hacılar adına Beynəlxalq Elmi-Mədəni Tədqiqatlar Fondunun rəhbəri (Türkiyə) Cingiz Alyılmaz, Türk Dünyası Mühəndislər və Memarlar Birliyinin sədri İlyas Dəmirçi, Yassi Rumın Dilçilik İnstitutunun müdiri E. Munteanu, Gürcüstan prezidentinin anası, Gürcüstan-Azərbaycan “Dostluq Evi”nin prezidenti Giuliya Alasaniya və başqaları çıxış edərək Borçalı alimi, pr. Doktor Valeh Hacıların xatirəsinə həsr edilən beynəlxalq elmi simpoziumun böyük əhəmiyyət kəsb etdiyini, folklorşünaslar və dilçi alimlər arasında elmi-mədəni əlaqələrin gücləndirilməsinə böyük bir töhfə olduğunu bildiriblər. Tədbirdə qeyd olunub ki, Cənubi Qafqazda folklorşünaslığa aid keçirilən belə bir elmi simpozium ilk dəfədir ki, keçirilir.
Tədbir Azərbaycan Milli Elmlər Akademiyası Folklor İnstitutu, İ.Cavaxişvili adına TDU, Türkiyənin Ərdahan Universiteti, Qafqaz Universitetlər Birliyi, Türk Dünyası Mühəndislər və Memarlar Birliyi və Valeh Hacılar adına Beynəlxalq Elmi-Mədəni Tədqiqat Fondunun təşkilatçılığı ilə baş tutub. Beynəlxalq simpoziumda Azərbaycan da daxil olmaqla müxtəlif ölkələrin qafqazşünaslıq və türkologiya üzrə 200-dən çox görkəmli alim və folklorşünaslar, elm adamları, jurnalistlər və ziyalılar iştirak edir. Məlumata görə simpoziumda müxtəlif bölmələrdə “Türkologiya və Qafqazşünaslığın problematikası”, “Qafqaz xalqlarının folkloru”, “Qafqaz xalqlarının tarixi və mədəniyyəti”, “lingvokulturologiya (areal linqvistika, tipologiya və komparavistika)” mövzularında gürcü, Azərbaycan, Türk, ingilis və rus dillərində elmi mühazirələr oxunacaq.
Aprelin 18-də TDU-nun konfrans zalında bir çox folklorşünas alimlərə Valeh Hacılar adına Beynəlxalq Elmi-Mədəni Tədqiqatlar Fondunun “Türk dünyasına xidmət” ödülü təqdim edilib.
Simpozium aprelin 21-ə qədər davam edəcək. Sonda simpozium iştirakçıları Dmanisi qalasına baş çəkəcək, buradakı arxeologiya muzeyində olacaq, Bolnisi rayonunun Darvaz kəndində professor Valeh Hacıların məzarını ziyarət edəcəklər.
Simpoziumun materialları 300 səhifəlik kitabda toplanaraq və beş dildə dərc olunacaq. Sabah tədbir Suxumi Dövlət Universitetində davam edəcək.
Qeyd edək ki, professor Valeh Hacılar uzun illər Azərbaycan-gürcü ədəbi əlaqələrini tədqiq edib. 30 kitab müəllifidir. Xalqlararası əlaqələrin öyrənilməsi və gücləndirilməsi sahəsində göstərdiyi xidmətlərinə görə Gürcüstan prezidenti tərəfindən “Şərəf” ordeni ilə təltif olunub.