MDB

Ana səhifə

MDB

Vəkil Eka Beseliya: ”İrakli Okruaşvilinin siyasi sığınacaq almaq şansı yüksəkdir”

19 dekabr 2007 12:41 (UTC +04:00)

Bu sözləri APA-nın Gürcüstan bürosuna açıqlamasında sabiq nazirin vəkili Eka Beseliya deyib. O, əminliklə bildirib ki, Gürcüstan hakimiyyəti Almaniya məhkəməsində İ. Okruaşvilinin siyasi məhbus olmadığını sübut edə bilməyəcək: “Okruaşvilinin siyasi sığınacaq almaq şansı yüksəkdir. Çünki bizim Almaniya məhkəməsində sadaladığımız faktlar bunun üçün kifayətdir. Bizimlə birlikdə çalışan alman vəkillər də onun siyasi məhbus olduğunu təsdiq etdilər”. E. Beseliya hazırda İ. Okruaşvilinin özünü Gürcüstanda olduğundan daha yaxşı hiss etdiyini söyləyib: “O, təkadamlıq kamerada saxlanılır. Biz Almaniyada olarkən onunla hər gün görüşə bilirdik”. Vəkil İ. Okruaşvilinin qarşıdakı seçkidə birləşmiş müxalifətin namizədi Levan Qaçeçiladzeni dəstəklədiyini açıqlayıb. Keçmiş nazir bununla bağlı xüsusi bəyanat da imzalayıb.
Qeyd edək ki, İ. Okruaşvili noyabrın 27-də Gürcüstan hakimiyyətinin müraciəti əsasında Berlində həbs edilib. Berlin Məhkəməsinin dekabrın 3-də verdiyi qərara əsasən ekstradisiya ilə bağlı aparılan məhkəmə prosesi dövründə o, təcridxanada qalmalıdır. /APA/