Mədəniyyət siyasəti

Ana səhifə

Mədəniyyət siyasəti

Nardaran Dövlət Tarixi-Mədəniyyət Qoruğunda “Mənəviyyat dolu Ramazan” adlı xeyriyyə tədbiri keçirilib

23 sentyabr 2009 12:35 (UTC +04:00)

Bakı. Ülkər Qasımova-APA. Bu gün Nardaran Dövlət Tarixi-Mədəniyyət Qoruğunda Ramazan bayramı münasibəti ilə “Mənəviyyat dolu Ramazan” adlı xeyriyyə tədbiri keçirilib. APA-nın məlumatına görə, tədbirdə mədəniyyət və turizm naziri Əbülfəs Qarayev, onun müavini Ədalət Vəliyev, Sabunçu rayonun icra başçısı Əlibaba Əliyev, Sabunçu rayonundan seçilmiş millət vəkili Eldar Quliyev və başqaları iştirak ediblər. Ə. Qarayev Nardaranda keçirilən tədbirin önəmliliyindən danışıb və bundan sonra bu cür tədbirlərin ənənəvi olaraq keçiriləcəyini qeyd edib: “Əslən Bakı kəndlərindən olan, dünyada sayılıb-seçilən insanlar var. Bu gün Qara Qarayevin musiqisi dünyanın ən məşhur muzeyi olan Luvrda səslənir. Mir Cəlal Paşayevin yaradıcılığı maraqla izlənilir. Bu tədbir 1983-cü ildə fəaliyyətə başlayan qoruqda keçirilir və bu da çox əhəmiyyətlidir. Bu il Bakının İslam Mədəniyyətinin Paytaxtı elan edilməsi çərçivəsində dünyanın 50-60 ölkəsində Azərbaycan mədəniyyət və incəsənət ustalarının iştirakı ilə tədbirlər keçirilib. Bu tədbirlər çərçivəsində Azərbaycana istedadlar bəxş edən Nardaranda da tədbir keçirilməsi bizim üçün çox böyük hadisədir”.
Tədbirdə çıxış edən rayon icra başçısı Əlibaba Əliyev, millət vəkili Eldar Quliyev, axund Hacı Musa bu cür tədbirlərin davamlı olaraq keçirilməsinin vacibliyini vurğulayıblar. Tədbirdə Nardaran kənd sakinləri mədəniyyət və turizm nazirinə müraciət edərək kənddəki abidələrin, eləcə də Nardaran Mədəniyyət Evinin əsaslı təmiri üçün şərait yaradılmasını arzulayıblar. Kənd sakinləri həmin Mədəniyyət Evində gənclərin müasir dövrlə ayaqlaşması üçün kompüter və xarici dil kurslarının təşkil edəcəklərini vurğulayıb. Ə. Qarayev isə kənd sakinlərinin bu müraciətini müsbət həll olunacağına söz verib: “Sadaladığınız problemlərin həlli üçün biz xüsusi plan hazırlayacağıq. Çox güman ki, növbəti illərin planına Nardaran Mədəniyyət Evinin təmiri də salınacaq”. Daha sonra kənd sakinləri mədəniyyət və turizm nazirinə Kərbəla ziyarətindən gətirilmiş Qurani-Kərim hədiyyə ediblər. Tədbirə dəvətli olan, ancaq səfərdə olması səbəbilə iştirak edə bilməyən Hacı Allahşükür Paşazadənin mərasimdə iştirak edən nümayəndəsinə xüsusi hədiyyə verilib. Tədbirdə “Kərbalə- İlahilər” qrupunun ifasında ilahilər səsləndirilib.
Qeyd edək ki, tədbir çərçivəsində Nardaran qalası (XII əsr), Rəhimə xanım ziyarətgahı, Xan bağı Köşkünün ziyarəti nəzərdə tutulsa da, hava şəraiti buna imkan verməyib.