Mədəniyyət siyasəti

Mədəniyyət siyasəti

Azərbaycanın aşıq sənəti və Novruz bayramı UNESCO-nun qeyri-maddi mədəni irs üzrə siyahısına daxil edilib

30 sentyabr 2009 13:39 (UTC +04:00)

Bu barədə APA-ya Mədəniyyət və Turizm Nazirliyinin mətbuat katibi İntiqam Hümbətov məlumat verib. Onun sözlərinə görə, Azərbaycan aşıq sənətinin UNESCO-nun qeyri-maddi mədəni irs üzrə reprezentativ siyahısına daxil edilməsi istiqamətində görülmüş işlər Heydər Əliyev Fondunun rəhbərliyi ilə Azərbaycan Respublikası Mədəniyyət və Turizm Nazirliyi tərəfindən həyata keçirilib. Bu məqsədlə “Azərbaycan aşıq sənəti” faylı hazırlanaraq UNESCO-ya təqdim edilib.

Müvafiq fayl hazırlanıb hökumətlərarası komitənin iclasında müzakirə olunmaq üçün UNESCO-ya təqdim olunduqdan sonra bu yolda atılmış növbəti addım aşıq sənətinin təbliği və inkişafı məqsədilə Mədəniyyət və Turizm Nazirliyi tərəfindən Tədbirlər Planının hazırlanması olub. Planın həyata keçirilməsi ilə bağlı dəyirmi masanın keçirilməsi, Aşıqlar birliyinin bərpası məqsədilə Aşıqların qurultayının keçirilməsi, aşıqların iştirakı ilə xarici ölkələrdə konsert proqramlarının təşkil olunması, Aşıqlar Birliyinin yaradılması, fəxri adların verilməsi, aşıqların yubileylərinin qeyd olunması, kitabların və notların çap edilməsi, orta və ali musiqi məktəblərində aşıq sənətinin tədris olunması istiqamətində geniş miqyaslı işlər görülüb. Bununla yanaşı, Azərbaycan dövləti və Fransanın “Maison des cultures du Monde” şirkətinin birgə əməkdaşlığı nəticəsində Azərbaycan və Fransada CD disklər buraxılıb, Fransanın Paris (Luvr muzeyində) və Strasburq şəhərlərində Azərbaycan aşıqları konsert proqramları ilə çıxış edib, həmçinin ölkə xarici və daxilində keçirilmiş bir sıra digər dövlət əhəmiyyəti tədbirlərə cəlb edilib, habelə bu istiqamətdə Nazirlik tərəfindən təşviqat işləri və lobbiçilik fəaliyyətləri həyata keçirilib. Azərbaycan dövlətinin, xüsusilə UNESCO və İSESKO-nun xoşməramlı səfiri, millət vəkili Mehriban xanım Əliyevanın aşıq sənətinin qorunması, inkişafı və təbliği istiqamətində fəaliyyəti nəticəsində cari ilin 28 sentyabr - 02 oktyabr tarixində Birləşmiş Ərəb Əmirliyinin Abu-Dabi şəhərində UNESCO-nun Qeyri maddi-mədəni irsin qorunması üzrə Komitəsinin 4-cü sessiyasında UNESCO-nun Hökumətlərarası Komitəsinin yekun qərarına əsasən Azərbaycanın aşıq sənəti UNESCO-nun Qeyri-maddi mədəni irs üzrə reprezentativ siyahısına daxil edilib: “Bu gün biz Azərbaycan hökumətinin həyata keçirdiyi məqsədyönlü siyasət və bu istiqamətdə müvafiq tədbirlər nəticəsində Azərbaycan aşıq sənətini dünya qeyri-maddi irsinin inciləri sırasında görürük. Bu hadisə beynəlxalq səviyyədə aşıq sənətinin Azərbaycan mədəni irsinin ən qədim nümunələrindən biri olduğunu bir daha təsdiqləyi”. Mətbuat katibi deyib ki, bununla yanaşı, Abu-Dabidən daha bir xoş xəbər daxil olub. Belə ki, Azərbaycanda dövlət səviyyəsində qeyd edilən Novruz bayramı da UNESCO-nun Qeyri-maddi mədəni irs üzrə Reprezentativ siyahısına daxil edilib.
Novruz bayramının bir sıra dövlətlərdə qeyd edildiyi nəzərə alınaraq təşkilatın tövsiyəsi ilə beynəlmiləl qeyri-maddi mədəni irs nümunəsi kimi UNESCO-ya təqdim edilib. Qeyd edək ki, 2003-cü ildə muğam sənəti UNESCO-nun Qeyri-maddi mədəni irs üzrə Reprezentativ siyahısına daxil edilmişdi.