Mədəniyyət siyasəti

Ana səhifə

Mədəniyyət siyasəti

Yaponiyada beynəlxalq sərgidə Ermənistanın stendində qondarma “Dağlıq Qarabağ Respublikası”nın xəritəsini nümayiş etdirmək cəhdinin qarşısı alınıb

01 oktyabr 2009 16:37 (UTC +04:00)

Bakı. Ülkər Qasımova – APA. Yaponiyanın Tokio şəhərində keçirilən “JATA” beynəlxalq turizm sərgisində Ermənistan stendində qondarma “Dağlıq Qarabağ Respublikası”nın xəritəsini nümayiş etdirməyə cəhd göstərib. Azərbaycanın Yaponiyadakı səfirliyinin və Mədəniyyət və Turizm Nazirliyinin nümayəndəsinin bəyanatı və təkidi ilə bu cəhdin qarşısı alınıb. Bu barədə APA-ya məlumat verən Mədəniyyət və Turizm Nazirliyinin mətbuat katibi Zöhrə Əliyeva bildirib ki, qondarma “Dağlıq Qarabağ Respublikası”nın xəritəsi stenddən yığışdırılıb: “Qeyd etmək lazımdır ki, Yaponiyadakı Azərbaycan səfirliyinin əməkdaşları iş prosesində bizi diqqətdən kənar qoymadılar. Tokiodakı sərgi “TOKYO BiQ SİGT” adlanan möhtəşəm bir biznes mərkəzində keçirilirdi. Bu ilki göstəricilərə görə Asiya qitəsinin ən böyük, rəsmi adı Beynəlxalq Turizm Konqresi və Səyahətlər Yarmarkası olan bu sərgidə 150 ölkə və region iştirak edib. Hər il konqresin və yarmarkanın müəyyənləşdirilmiş mövzuları olur. Bu dəfə də konqresin mövzusu Asiya, yarmarkanın mövzusu isə Afrika ölkələri idi”.
Z. Əliyeva deyib ki, “JATA”-nın Təşkilat komitəsinin iddialarına görə, bu il 100 minə yaxın ziyarətçi JATA vasitəsi ilə müxtəlif ölkələrin mədəniyyəti, yerli və xarici şirkətlərin turizm potensialı, yeni turizm istiqamətləri ilə tanış olub. Azərbaycan bu sərgidə artıq üçüncü dəfə iştirak edib. Azərbaycan bu tədbirdə Mədəniyyət və Turizm Nazirliyinin Turizm şöbəsinin əməkdaşı Vüqar Şıxəmmədov, Analitik təhlil və proqramlar təminatı şöbəsinin aparıcı məsləhətçisi, mətbuat katibi Zöhrə Əliyeva, şöbənin məsləhətçisi Türkan İsmayılova və bir sıra turizm şirkətləri ilə təmsil olunub.