Mədəniyyət siyasəti

Ana səhifə

Mədəniyyət siyasəti

Türkdilli ölkələrin dövlət başçılarının zirvə görüşündə TÜRKSOY Fondu və Türkdilli Akademiya yaradılması ilə bağlı təkliflər səsləndirilib

04 oktyabr 2009 10:54 (UTC +04:00)

APA-nın Azərtac Dövlət Agentliyinə istinadən verdiyi xəbərə görə, prezident TÜRKSOY Fondu yaradılması ilə bağlı təklif səsləndirib: “Fondun maliyyə təminatı təşkil edilsin və bu Fond bütün türk dövlətlərində və eyni zamanda bütün türk diyarlarında tarixi abidələrin bərpası, mədəniyyətlərarası əlaqələrin inkişafı ilə məşğul olsun. Bir sözlə, Fond praktiki cəhətdən səmərəli işlərlə xalqlarımızı daha da sıx birləşdirsin. Dünyada türkdilli xalqlar çoxdur və türkdilli xalqlar arasında dostluq, qardaşlıq ölkələrimizi də gücləndirəcək”.

Qazaxıstan prezidenti Nursultan Nazarbayev də prezident İlham Əliyevin TÜRKSOY Fondu yaradılması barədə təklifini dəstəklədiklərini bildirib.
Qazaxıstan prezidenti həmçinin Türkdilli Akademiyanı da yaratmaqla bağlı təklif səsləndirib. O bildirib ki, akademiya türkdilli xalqların dilinin, mədəniyyətinin araşdırılması və öyrənilməsi ilə məşğul olacaq: “Əgər hər hansı bir türkdilli dövlət öz yardımını göstərəcəksə, hesab edirik ki, bu akademiyanı türkdilli aləmin çox müqəddəs torpağı - Türküstanda yerləşdirmək olardı və yaxud bu akademiya Astanada təsis oluna bilərdi. Bu baxımdan indi Xoca Əhməd Yasəvi adına Universitet böyük işləri həyata keçirir”.

Türkdilli ölkələrin birliyindən danışan Azərbaycan prezident İlham Əliyev türkdilli xalqlar, ölkələr arasında birliyin daha da güclənməsinə tərəfdar olduğunu da vurğulayıb: “Bu, bizim tariximizdir, bizim mədəniyyətimizdir, bizim köklərimizdir. Eyni zamanda, bu, bugünkü vəziyyətin reallıqlarıdır. Biz bilirik ki, beynəlxalq müstəvidə öz mövqeyini müdafiə etmək bəzi hallarda o qədər də asan olmur. Biz birlikdə olsaq, müəyyən məsələlərdə vahid mövqedən çıxış etsək və bu birliyi mütəmadi işlərlə möhkəmləndirsək, beynəlxalq mövqelərimiz daha da güclü olacaq”.
Türkdilli ölkələrdə təbii sərvətlər, neft-qaz yataqları, əlverişli coğrafi vəziyyət, güclü iqtisadiyyatlar, insanların istedadı, mövcud olan yeni infrastruktur olduğunu deyən dövlət başçısı “bütün bu imkanları bir yerə toplasaq və bir yerdə cəmləşdirsək türkdilli ölkələr dünya miqyasında böyük gücə çevriləcək” deyib.

Prezident daha sonra əlavə edib: “Bu gücə çevrilmək üçün biz səmərəli işləməliyik. Bu, bizim əlimizdədir, bizim iradəmizdən asılıdır. Mən çox şadam ki, bizim aramızda olan birlik son illər ərzində daha da güclənir. Dünən və bu gün hesab edirəm ki, türkdilli ölkələrin daha da sıx birləşməsi üçün çox vacib addımlar atılıb. Bizim bir yerdə olmağımız, qədim Azərbaycan torpağı olan Naxçıvanda yığışmağımız, ikitərəfli formatda aparılan danışıqlar, bugünkü zirvə görüşü və zirvə görüşünün nəticəsi olan imzalanacaq vacib sənədlər bizim birliyimizi daha da gücləndirəcək. Bu, bizim arzumuzdur və mən əminəm ki, biz bütün arzularımıza çatacağıq”.