Mədəniyyət siyasəti

Ana səhifə

Mədəniyyət siyasəti

Azərbaycanın yeddi muzeyinin internet saytlarının təqdimat mərasimi keçirilib

12 oktyabr 2009 10:27 (UTC +04:00)

Bakı. Ülkər Qasımova - APA. Bu gün Muzey Mərkəzində Azərbaycanda fəaliyyət yeddi muzeyin veb-saytının təqdimatı mərasimi keçirilib. APA-nın məlumatına görə, bütün muzeylərin veb-saytı Mədəniyyət və Turizm Nazirliyi, Bakı şəhər Mədəniyyət və Turizm İdarəsinin təşkilatçılığı ilə hazırlanıb. Tədbirdə ilk öncə hazırlanan veb-saytlar haqqında ətraflı məlumat verilib. Bu saytlar Heydər Əliyev adına Muzey – www.muzey-park.az, Cəfər Cabbarlının Ev Muzeyi – www.cabbarli.az, Cəlil Məmmədquluzadənin Ev Muzeyi – www.memmedquluzade.az, Əzim Əzimzadənin Ev Muzeyi – www.ezimzade.az, Nəriman Nərimanovun xatirə muzeyi – www.nerimanov.az, Məmməd Səid Ordubadinin xatirə muzeyi – www.ordubadi.az, Azərbaycan Dövlət Din Tarixi muzeyi – www.dintarixi.az – dan ibarətdir. Qeyd olunan hər bir saytda muzeylərin fəaliyyəti ilə bağlı geniş məlumatlar, fotolar, maraqlı video lentləri yerləşdirilib. Tədbirdə çıxış edən mədəniyyət və turizm naziri Əbülfəs Qarayev hazırlanan veb-saytları yüksək dəyərləndirdiyini qeyd edib və bu işin davamını arzulayıb: “Bu iş çox təqdirəlayiq bir işdir. Ancaq muzeylərimizin işini bununla yekunlaşdırmaq olmaz. Muzeylərə daha çox axın cəlb etmək üçün var gücümüzlə çalışmalıyıq. Bugünkü durum elədir ki, muzeylərimiz fəaliyyətləri ilə öz maliyyə durumlarını həll edə bilmirlər. Muzeylərə baxmaq üçün çox az insan gəlir və bu da az biletin satılmasına gətirib çıxarır. Bu, muzeylərimizin ən önəmli problemidir. Ümid edirik ki, bu saytların yaradılması problemi qismən də olsa aradan qaldıracaq”. Nazir qeyd edib ki, muzeylərə yeni eksponatların alınması da bu gün üçün vacib məsələlərdəndir: “Uzun illər ümumiyyətlə muzeylərə yeni eksponatlar alınmırdı. Bu problem son bir neçə ildə qismən həll olunsa da, görülən iş yetərli deyil. Eləcə də hər muzeyin özünəməxsus suveniri hazırlanmalıdır. Bu iş bu gün Muzey Mərkəzində həyata keçirilir və çox təqdir edilir”.