Mədəniyyət siyasəti

Ana səhifə

Mədəniyyət siyasəti

Bakıda İslam Konfransı Təşkilatına üzv ölkələrin mədəniyyət nazirlərinin VI konfransı keçirilir

13 oktyabr 2009 09:35 (UTC +04:00)

APA-nın məlumatına görə, konfrans müqəddəs “Qurani-Kərim”dən ayələrin oxunması ilə başlanıb. İslam Konfransı Təşkilatına üzv ölkələrin mədəniyyət nazirlərinin VI konfransında Şimali Kipr Türk Respublikası, İraq, Liviya, Mavritaniya, Mərakeş, Fələstin, Qatar, Səudiyyə Ərəbistanı, Birləşmiş Ərəb Əmirlikləri, Sudan, Suriya, Tacikistan, Toqo, Əlcəzair, Banqladeş, Qabon, Kamerun, Çad, Yəmən Ərəb Respublikası, Tatarıstan, Başqırdıstan, Tıva Respublikası, Xakasiya və digər ölkələrin mədəniyyət nazirləri, İran İslam Mədəniyyət və Kommunikasiya Təşkilatının rəhbəri, Oman Respublikasının kral ailəsinin üzvü, mədəniyyət naziri, İSESKO, İRSİKA, Avropa Şurası və TÜRKSOY təşkilatlarının baş direktorları, Avstriya, Vatikan, Gürcüstanın mədəniyyət nazirliklərinin nümayəndələri, bir sıra Universitet və Akademiyaların rəhbərləri, bir çox beynəlxalq təşkilatların Azərbaycanda akkreditə olunmuş nümayəndə və səfirləri, Azərbaycan hökumətinin nümayəndələri iştirak edir. Konfransın işində 45-dən çox dövlətdən 25 nazir, 11 nazir müavini, 18 beynəlxalq təşkilatın nümayəndəsi, ümumilikdə 200-dən çox qonaq iştirak edir. Konfrans oktyabrın 15-dək öz işini davam etdirəcək. Konfransda Qafqaz Müsəlmanları İdarəsinin sədri, Şeyxülislam Hacı Allahşükür Paşazadə, mədəniyyət və turizm naziri Əbülfəs Qarayev, Avropa Şurasının Mədəniyyət və Mədəni-İrs üzrə direktorluğunun rəhbəri Robert Palmer, İSESCO-nun baş direktoru Əbdüləziz Ozman İbn – Tüveycri və başqaları iştirak edir.
İslam Konfransı Təşkilatına üzv dövlətlərin mədəniyyət nazirlərinin VI Konfransında Azərbaycan Respublikasının prezidenti İlham Əliyevin təbrik məktubu oxunub. APA-nın məlumatına görə, dövlət başçısının təbrik məktubunu iştirakçılara baş nazirin I müavini Elçin Əfəndiyev çatdırıb. Dövlət başçısının təbrik məktubunda deyilir: “2009-cu il üçün Bakının İslam Mədəniyyətinin Paytaxtı elan edilməsi müxtəlif sivilizasiyaların qovşağında yerləşən ölkəmizin zəngin tarixinə və mədəniyyətinə yüksək qiymətdir. Gün ərzində gerçəkləşən tədbirlər İslam Konfransı təşkilatları çərçivəsində mədəni əlaqələrimizin inkişafına layiqli töhvələr verib, bir daha Azərbaycanın böyük İslam mədəniyyətinin formalaşmasında tutduğu mövqeyə diqqəti cəlb edib. Respublikamızda hökm sürən tolerantlıq mühitini biz böyük tarixi nailiyyətimiz kimi dəyərləndirir, bu ənənələri davam etdirəcək, müxtəlif dinlər və mədəniyyətlər arasında konstruktiv dialoqun qurulması prosesinə daim diqqət yetirilir. Əminəm ki, bu konfransında müxtəlif sivilizasiyaların, ortaq mənəvi, mədəni dəyərlərə əsaslanan səmərəli əməkdaşlıq səylərinə kömək edir”.
Təbrik məktubunda bildirilir ki, Azərbaycan özünün müasir, tarixi-mədəni irsinin qorunması və tədbirinə dair beynəlxalq miqyaslı bir çox layihələri həyata keçirir: “Lakin 20 ildən artıq davam edən Ermənistan-Azərbaycan Dağlıq Qarabağ münaqişəsi nəticəsində erməni silahlı birləşmələri tərəfindən işğala məruz qalmış torpaqlarımızdakı İslam mədəniyyətinə aid bütün nümunələr, o cümlədən dini məbədlər, məscidlər və abidələr dağıdılıb. Məruz qaldığımız bu təcavüzlə bağlı olaraq daim İslam Konfransı Təşkilatına üzv dövlətlər tərəfindən Azərbaycanın haqq mövqeyinin dəstəklənməsi ölkəmizdə hər zaman təqdirlə qarşılanıb. İnanıram ki, konfransda İslam Dünyası Mədəniyyətinin aktual məsələlərinə dair ətraflı müzakirələr aparılacaq, ölkələrimiz və xalqlarımız arasında qarşılıqlı mədəni əməkdaşlığın yeni inkişaf yolları müəyyən ediləcək”.
Dövlət başçısının təbrik məktubundan sonra konfransda İSESCO-nun baş katibi Əbdüləziz İbn Əl-Tüveycri çıxış edib. Çıxışında bir çox məsələlərə toxunan baş katib bu tədbirin Bakıda keçirilməsini yüksək qiymətləndirdiyini qeyd edib. Eyni zamanda o, dünya ölkələri arasında gedən münaqişələrin tez bir zamanda həll olunmasının tərəfdarı olduğunu konfrans iştirakçılarının diqqətinə çatdırıb.
Qeyd edək ki, 2007-ci ilin 21-23 noyabr tarixində Liviyanın Tripoli şəhərində keçirilən İslam ölkələrinin mədəniyyət nazirlərinin V Konfransında Bakı şəhərinin 2009-cu il üçün “İslam Mədəniyyətinin Paytaxtı” elan olunması və nazirlərin VI Konfransının 2009-cu ildə Bakıda keçirilməsi qərara alınıb. Bununla əlaqədar “Bakı-İslam Mədəniyyətinin Paytaxtı-2009” Mədəniyyət İlinin proqramına 100-dən artıq milli və beynəlxalq miqyaslı tədbir daxil edilib. Tədbirlər sırasında Mədəniyyət ilinin açılış və bağlanış mərasimləri, İslam Konfransı Təşkilatına üzv dövlətlərin Mədəniyyət Nazirlərinin VI Konfransı, Türkdilli dövlətlərin mədəniyyət nazirlərinin toplantısı, Beynəlxalq Muğam Festivalı, Azərbaycanda Mərakeş Krallığının, Qətər Dövlətinin, İordaniyanın Mədəniyyət Günləri, “Şərq-Qərb” Beynəlxalq Kinofestivalı, İqtisadi Əməkdaşlıq Təşkilatına üzv ölkələrin Milli Kitabxana direktorlarının II Konfransı, İSESKO-ya üzv dövlətlərin Beynəlxalq Turizm Filmləri Festivalı, Şərq-Qərb Beynəlxalq Rəqs Festivalı, İslam Mətbəxi I Beynəlxalq Kulinariya Festivalı, I Bakı Beynəlxalq Kitab Sərgi-Yarmarkası və digərləri mühüm yer tutur.
Konfransın ilk günü İslam Konfransı təşkilatına üzv dövlətlər və bir sıra Avropa dövlətləri arasında “Mədəniyyətlərarası dialoq” mövzusunda dəyirmi masa təşkil edilib. Dəyirmi masa ideyası 2008-ci ilin 2-3 dekabrında Bakıda keçirilmiş Avropa ölkələrinin mədəniyyət nazirlərinin konfransında irəli sürülüb və həmin konfransda əsası qoyulan “Mədəniyyətlərarası dialoqa dair Bakı prosesi” çərçivəsində həyata keçirilir. Konfransdan öncə cari ilin 9-10 oktyabr tarixində Bakıda həmçinin İslam Dünyasının Mədəni Strategiyasının yerinə yetirilməsinə dair Məşvərətçi Şuranın IX İclası olub. İclasda konfransda qəbul ediləcək sənədlərin müzakirəsi aparılıb. Bununla yanaşı, 2009-cu ilin 16-17 oktyabr tarixində Bakıda TÜRKSOY Mədəniyyət Nazirlərinin Daimi Şurasının 26-cı toplantısı olacaq. İclasda TÜRKSOY-a üzv olan ölkələrin mədəniyyət nazirləri və bir sıra təşkilatların nümayəndələri iştirak edəcək.