Mədəniyyət siyasəti

Ana səhifə

Mədəniyyət siyasəti

Lənkəranda “İslamda mənəvi dəyərlər” mövzusunda rəsm sərgisi açılıb

13 oktyabr 2009 19:36 (UTC +04:00)

Lənkəran. Ağəddin Babayev - APA. Bu gün Nəcəf bəy Vəzirov adına Lənkəran Dövlət Dram Teatrının foyesində “İslamda mənəvi dəyərlər” mövzusunda rəsm sərgisinin açılışı olub.

APA-nın cənub bürosunun məlumatına görə, 2009-cu ilin Bakı şəhərinin İslam mədəniyyətinin paytaxtı elan edilməsi ilə əlaqədar Mədəniyyət və Turizm Nazirliyinin təşkilatçılığı ilə keçirilən mərasimdə nazirliyin sektor müdiri Rafiq Quliyev çıxış edərək bölgələrdən ilk dəfə Lənkəranda bu cür sərginin təşkil olunduğunu, növbəti mərhələlərdə digər bölgələrdə də belə tədbirlərin gerçəkləşəcəyini diqqətə çatdırıb.

Cənub bölgəsinin 12 şəhər və rayonundan həvəskar rəssamların və xalq tətbiqi sənəti ustalarının qatıldığı sərgidə 100-ə yaxın rəngkarlıq, sulu boya, qrafika, heykəltəraşlıq, misgərlik, zərgərlik və tikmə üzrə sənət əsəri nümayiş etdirilir.

Sərginin qalibləri Bakı şəhərində təşkil ediləcək ümumrespublika yekun sərgisində iştirak etmək hüququ qazanacaq. Daha çox fərqlənən sənət əsərlərinin müəlliflərinə isə Mədəniyyət və Turizm Nazirliyinin diplomları və pul mükafatları veriləcək.