Mədəniyyət siyasəti

Ana səhifə

Mədəniyyət siyasəti

Bakıda keçirilən islam ölkələrinin mədəniyyət nazirlərinin VI konfransında yekun sənəd qəbul edilib

14 oktyabr 2009 15:12 (UTC +04:00)

Bakı. Ülkər Qasımova-APA. Bakıda keçirilən islam ölkələrinin mədəniyyət nazirlərinin VI konfransında yekun sənəd qəbul edilib. APA-nın məlumatına görə, mədəniyyət və turizm naziri Əbülfəs Qarayev jurnalistlərə açıqlamasında bildirib ki, konfransın yekun sənədində İslam ölkələrində gedən mədəni proseslərin müsbət tendensiyaları haqqında geniş mənzərə təsvir olunub: “Hesab edirəm ki, yekun bəyannamədə Azərbaycanın işğal altında olan torpaqlarında dağıdılan tarixi-mədəni abidələrin irsimizin məhv 7olunmasına atılan addımların pislənməsi və bütün konfrans iştirakçıları tərəfindən birmənalı şəkildə Ermənistandan Birləşmiş Millətlər Təşkilatına qəbul olunmuş dörd qətnamənin icra olunması tələbi ondan xəbər verir ki, islam ölkələri Azərbaycanın mövqeyinə dəstək verir və gələcəkdə də verəcək”.

Nazir qeyd edib ki, ümumiyyətlə islam mədəniyyətinin dünyada daha geniş təbliğ olunmasına, bəşəriyyət tərəfindən daha yaxından tanınmasına və onun təbliğ olunmasına yönələcək addımlar atılmalıdır: “Bu addımlar sırasında islam ölkələri arasında turizm və mədəni turizmin inkişafı sahəsində xüsusi proqramların həyata keçirilməsi nəzərdə tutulur. Eyni zamanda müasir texnologiyaların tətbiqi və bunun vasitəsi ilə islam ölkələrinin potensialı, mədəniyyət haqqında geniş informasiyanın yayılması nəzərdə tutulur”.

Əbülfəs Qarayev vurğulayıb ki, bu gün konfransın yekun sənədi kimi qəbul olunan sənədlərin sırasında Azərbaycan üçün xüsusi önəm daşıyan məsələ 2018-ci ildə Naxçıvanın İslam Mədəniyyətinin Paytaxtı elan olunmasıdır: “Biz bu gündən etibarən bu istiqamətdə böyük tədbirlərin keçirilməsi üçün hazırlığa başlamağı nəzərdə tuturuq. Mən bütün naxçıvanlıları təbrik etmək və bu işdə böyük uğurlar diləyirəm. Hesab edirəm ki, Azərbaycanın mirvarisi olan Naxçıvanda İslam Mədəniyyətinin Paytaxtı çərçivəsində keçiriləcək tədbirlərlə biz bir daha Azərbaycanın zəngin mədəniyyətini və tariximizi bütün dünyaya nümayiş etdirməyə müvəffəq olacağıq”.

Qeyd edək ki, Bakıda İslam Konfransı Təşkilatına üzv olan islam ölkələrinin mədəniyyət nazirlərinin VI toplantısı çərçivəsində bir çox məsələlər müzakirə olunub. “Bakı – İslam Mədəniyyətinin Paytaxtı-2009” elan olunması çərçivəsində keçirilən konfransda 45 islam və Avropa ölkəsindən nümayəndələr iştirak edib. Konfransa Azərbaycan sədrlik edib. Konfrans iştirakçıları üçün bu gün və sabah mədəni proqramlar təşkil olunacaq. Sabah konfrans iştirakçıları üçün Azərbaycan Dövlət Akademik Opera və Balet Teatrında Qara Qarayevin “Yeddi gözəl” baleti nümayiş olunacaq.