Mədəniyyət siyasəti

Ana səhifə

Mədəniyyət siyasəti

Bakıda TÜRKSOY Daimi Şurasının XXVI toplantısının açılış mərasimi keçirilib

16 oktyabr 2009 14:05 (UTC +04:00)

Bakı. Ülkər Qasımova-APA. Bu gün Bakıda TÜRKSOY Daimi Şurasının XXVI toplantısının açılış mərasimi keçirilib. APA-nın məlumatına görə, açılış mərasimində çıxış edən mədəniyyət və turizm naziri Əbülfəs Qarayev Bakıda keçirilən toplantıya təşrif buyuran türk ölkələrin təmsilçilərinə təşəkkürünü bildirib: “TÜRKSOY Daimi Şurasının növbəti XXVI toplantısı bu gün və sabah Bakı şəhərində keçirilir. Beynəlxalq təşkilat olan TÜRKSOY Avrasiyanın türkdilli arealı çərçivəsində milli dil, tarix, mənəvi irs və müasir mədəniyyət və incəsənət yaxınlığı ilə birləşən ölkə və xalqların regional mədəni əməkdaşlığını həyata keçirir. TÜRKSOY təşkilatının əsası 1992-ci ilin yazında İstanbul şəhərində türkdilli dövlətlərin Mədəniyyət nazirlərinin Birinci görüşü keçirildiyi zaman qoyulub. Təşkilatın strukturu, idarəetmə orqanlarının və fəaliyyət mexanizmlərinin formalaşmasında təşkilatın 1992-ci ilin dekabrında Bakıda keçirilmiş İkinci Toplantısının böyük əhəmiyyəti oldu. İki gün müddətində keçən müddət ərzində təşkilatın fəaliyyəti,
maliyyə fəaliyyəti, TÜRKSOY-un hüquqi sənədlərinə düzəlişlər və əlavələr, eləcə də TÜRKSOY-un 2010-cu il üçün fəaliyyət Proqramının müzakirəsi və təsdiqi kimi məsələlər müzakirə olunacaq”.
Açılış nitqi ilə çıxış edən TÜRKSOY-un baş direktoru Düsen Kaseinov Azərbaycan hökumətinə bu cür mötəbər tədbirə təşkilatçılıq etdiyinə görə təşəkkürünü bildirib və sədrlik etdiyi təşkilatın əsas məqsədlərini açıqlayıb: “Bizim əsas məqsədimiz beynəlxalq münasibətlərin humanistləşdirilməsi və stabilləşdirilməsinə istiqamətlənən beynəlxalq ictimaiyyətin mənəvi inkişafının prioritetlərinin regional və planetar səviyyədə qəbul və təsdiq edilməsi, beynəlxalq dialoqun təşkili və inkişafı, TÜRKSOY üzv dövlətlərinin mədəni oxşarlığını dəstəklənməsi, türkdilli xalq və ölkələr arasında dost münasibətlərin və qarşılıqlı anlaşmanın qurulması, türkdilli xalqların etnogenezi, gerçək tarixi, ədəbiyyat, mədəniyyət və incəsənətinin öyrənilməsi sahəsində elmi araşdırmaların intensivləşdirilməsi, öz xalqlarının milli tarixinin, doğma dilinin, ədəbiyyatının, mədəniyyət və incəsənətinin və ənənələrinin yeni nəsil tərəfindən öyrənilməsinə dəstək və digər məsələlərdir. Türkdilli dövlətlərin rəhbərliyi tərəfindən TÜRKSOY-un fəaliyyəti daima dəstək və təqdir olunması öz əksini 2-3 oktyabr tarixlərində Naxçıvan şəhərində keçirilmiş türkdilli dövlətlərin Dövlət Başçılarının IX Sammitində qəbul edilmiş Naxçıvan Deklarasiyasında öz əksini tapıb. Hesabat müddəti ərzində Ankarada TÜRKSOY-un 15 illiyinə həsr olunmuş yubiley tədbirləri, İstanbul, Ankara, Nide, Manisa şəhərlərində Novruz bayramının qeyd edilməsi, TÜRKSOY rəssam və fotoqraflarının Laboratoriyaları, “Türk dillərinin bədii tərcüməsinin problemləri və müasir vəziyyəti”, “Sivilizasiyaların dialoqunda Türk dünyasının rolu” adlı simpoziumlar və digər tədbirlər keçirilib”.
D. Kaseinov qeyd edib ki, cari ilin 8-18 sentyabr tarixlərində Bişkek, Almatı, Ankara və Bakı şəhərlərində TÜRKSOY-un beynəlxalq layihəsi - Azərbaycan, Qazaxıstan, Qırğızıstan, Türkiyə, Başqırdıstan və Tatarıstanın opera teatrları solistlərinin iştirakı ilə məşhur Azərbaycan bəstəkarı Üzeyir Hacıbəyovun “Koroğlu” Operasının tamaşaya qoyulması böyük müvəffəqiyyətlə həyata keçirilib. Açılış mərasimində çıxış edən Türkiyənin mədəniyyət nazirinin müavini Kamal Fair Gənc, Qazaxıstanın mədəniyyət və informasiya naziri Janna Kurmanqaliyeva və digər qonaqlar toplantının işində uğurlar arzulayıblar.