Mədəniyyət siyasəti

Ana səhifə

Mədəniyyət siyasəti

Əbülfəs Qarayev Azərbaycanda səfərdə olan İran prezidentinin müşaviri Mehdi Müstafəvinin rəhbərlik etdiyi nümayəndə heyəti ilə görüşüb – FOTO

28 oktyabr 2009 11:50 (UTC +04:00)

Bakı. Ülkər Qasımova-APA. Bu gün Azərbaycanın mədəniyyət və turizm naziri Əbülfəs Qarayevlə Azərbaycanda səfərdə olan İran prezidentinin müşaviri, Mədəniyyət və İslami Əlaqələr Təşkilatının sədri Mehdi Müstafəvinin rəhbərlik etdiyi nümayəndə heyəti ilə görüşü keçirilib. APA-nın məlumatına görə, görüşdə qonaqları salamlayan mədəniyyət və turizm naziri Əbülfəs Qarayev iki ölkə arasında mədəniyyət və turizm sahəsində daha da sıx əməkdaşlığa başlanacağını vurğulayıb: “Bakıda İslam Mədəniyyətinin Paytaxtı ili çərçivəsində tədbirlər davam etdirilir. İranda bütün beynəlxalq mədəni və siyasi əlaqələrə cavabdeh olan bir təşkilatın sədri Azərbaycana rəsmi səfərlə təşrif buyurub. Hesab edirəm ki, Azərbaycanla İran arasında tarixi əsaslara söykənən mədəniyyət əlaqələrinin genişləndirilməsi məsələsi olduqca vacibdir. Minnətdaram ki, qonağımız bu dəvəti qəbul edərək ölkəmizə gəlib”.

Ə. Qarayev bildirib ki, üç gün davam edən səfər çərçivəsində İran prezidentinin müşaviri Mehdi Müstafəvi Azərbaycana İran arasında daha geniş əməkdaşlığın əsaslarını əyani olaraq görüb: “İlin sonuna kimi xüsusi tədbirlər planının təsdiq olunmasını planlaşdırırıq. O tədbirlər haqqında artıq hər iki tərəfdən qərarlar var və iki il müddətində İranla Azərbaycan arasında mədəniyyət və turizm sahəsində münasibətlər daha yüksək səviyyədə qurulacaq”. Daha sonra isə Azərbaycanın mədəniyyət və turizm naziri Azərbaycanın işğal altında olan torpaqlarında dağıdılan Azərbaycan və bütün islam dünyasına məxsus olan tarixi və mədəni abidələrdən söz açıb.

İran prezidentinin müşaviri, Mədəniyyət və İslami Əlaqələr Təşkilatının sədri Mehdi Müstafəvi rəhbərlik etdiyi nümayəndə heyəti ilə birgə Azərbaycanda səfərdə olduğuna şad olduğunu qeyd edib. Qonaq Əbulfəs Qarayev və Mədəniyyət və Turizm Nazirliyinə yüksək səviyyədə təşkil olunan səfərə görə təşəkkürünü bildirib: “İran İslam Respublikası ilə Azərbaycan arasında olan əlaqələr olduqca dərin və tarixi əsaslara söykənən əlaqələrdir. İki ölkənin rəsmiləri bu əlaqələrin daha da genişlənməsində israrlıdır, çünki bu əlaqələr iki ölkənin mənafeyi üçün olduqca əlverişlidir. Olduqca sevindirici haldır ki, istər təhsil, istər turizm və mədəniyyətin müxtəlif sahələrində əlaqələrin genişləndirilməsi üçün olduqca gözəl zəmin yaranıb. Biz bu səfər çərçivəsində Azərbaycanın müxtəlif rəsmi şəxsləri ilə, baş nazirin müavini Elçin Əfəndiyevlə, Gənclər və İdman Nazirliyində, Qafqaz Müsəlmanları İdarəsində, eləcə də Mədəniyyət və Turizm Nazirliyində görüşlər keçirdik. Görüş keçirdiyimiz rəsmi şəxslər iki ölkə arasında mədəni əməkdaşlığın genişləndirilməsində israrlıdır”. Mehdi Müstafəvi vurğulayıb ki, hazırda İranla Azərbaycan arasında mədəni əlaqələr sahəsində yeni bir səhifə açılıb: “Əbülfəs Qarayevlə görüş zamanı qərara gəldik ki, hər iki ölkədə qarşılıqlı olaraq mədəniyyət həftələri keçirilsin. Mədəniyyət sahəsində işçi qruplarının hazırlanması və bu sahədə lazımi sahələrin araşdırılması üçün təkliflər irəli sürüldü”.