Mədəniyyət siyasəti

Ana səhifə

Mədəniyyət siyasəti

Bakıda “Türk dilinin VIII Beynəlxalq Şeir Mərasimi” başlayıb – FOTOSESSIYA

Bakıda “Türk dilinin VIII Beynəlxalq Şeir Mərasimi” başlayıb – <font color=red>FOTOSESSIYA </font>

30 oktyabr 2009 12:39 (UTC +04:00)

Bakı. Ülkər Qasımova – APA. Səməd Vurğun adına Azərbaycan Dövlət Rus Dram Teatrının binasında “Türk dilinin VIII Beynəlxalq Şeir Mərasimi”nin açılışı keçirilib. APA-nın məlumatına görə, Türkiyə Yazarlar Birliyi tərəfindən birincisi 1992-ci ildə Bursada keçirilən “Türk dilinin Beynəlxalq Şeir Mərasimi”nin səkkizincisi bu dəfə Azərbaycan Yazıçılar Birliyi və Qafqaz Universiteti ilə birlikdə təşkil olunub. Tədbirə Azərbaycandan başqa Türkiyə, Qazaxıstan, Qırğızıstan, Türkmənistan, Özbəkistan, Gürcüstan, Şimali Kipr, İran, İraq, Bosniya, Bolqarıstan, Kosovo, Makedoniya, Moldova, Yunanıstan, Almaniya, Hollandiya, Belçika, Fransa, İngiltərə və Avstriyadan, eləcə də türkdilli xalqların yaşadığı digər yerlərdən gələn şairlər qatılıb. Türkiyə Yazarlar Birliyinin sədri İbrahim Yavuz mərasimdə ümumilikdə 100-ə yaxın şairin iştirak etdiyini açıqlayıb.

Azərbaycan Yazıçılar Birliyinin sədri, xalq yazıçısı Anar keçirilən tədbirin önəminə diqqət çəkərək Azərbaycan və Türkiyə arasındakı qardaşlıqdan söz açıb: “Bir çox dövlətlər arasındakı problemləri və sərhədləri şairlər aşır. Bu problemlər məhz şeirlə aradan qalxır. Bütün qonşu dövlətlər bir-birinə dayaq olmalıdır. Ancaq Türkiyə bizim qonşumuz yox, qardaşımızdır. Qardaşlar arasına girə bilmək qeyri-mümkündür və bu, ola bilməz. Necə ki, Azərbaycan Türkiyəyə güvənir, Türkiyə də hər zaman Azərbaycana tam güvənə bilər. Türkiyə bayrağı Azərbaycanda necə müqəddəsdirsə, Türkiyədə də Azərbaycan bayrağı o qədər müqəddəsdir”.

Tədbirdə çıxış edən Türkiyə Böyük Millət Məclisinin Türkiyə-Azərbaycan dostluq qrupunun sədri Mustafa Kabakçı da Azərbaycan-Türkiyə qardaşlığını heç kəsin poza bilməyəcəyini xüsusi çoşğu ilə vurğulayıb. M. Kabakçının bu çıxışı bütün tədbir iştirakçıları tərəfindən gurultulu alqışlarla qarşılanıb.

Qeyd edək ki, Türk dilinin 8-ci Beynəlxalq Şeir Mərasiminə Azərbaycandan 21 şair qatılıb. Bu şairlər arasında Çingiz Əlioğlu, Ramiz Rövşən, Vaqif Bayatlı Önər, Vaqif Bəhmənli, Nazim Əhmədli, Maarif Soltan, Qulu Ağsəs, Səlim Babullaoğlu, İlqar Fəhmi, Rəşad Məcid, Ədalət Əsgəroğlu, Rüstəm Behrudi, Mahirə Əlyanlı, Adil Cəmil Xanəmir, Qəşəm Nəcəfzadə, Qismət, Vüsal Nuru, Rəbiqə Narıngül də var. İştirakçılara 12-ci əsrin böyük şairi Nizami Gəncəvi, Türkiyədə XX əsrin böyük şairlərindən Əhməd Haşim və XX əsrdə Azərbaycanın böyük şairlərindən Hüseyn Cavid adına mükafatlar veriləcək. Tədbir noyabrın 1-nə kimi davam edəcək.