Mədəniyyət siyasəti

Ana səhifə

Mədəniyyət siyasəti

Azərbaycan Etnoqrafiya Muzeyinin baş planının layihəsinin hazırlanması üzrə beynəlxalq müsabiqə elan edilib

03 noyabr 2009 08:17 (UTC +04:00)

Bakı. Ülkər Qasımova-APA. Mədəniyyət və Turizm Nazirliyi Azərbaycan Etnoqrafiya Muzeyinin baş planının layihəsinin hazırlanması üzrə beynəlxalq müsabiqə elan edib. Mədəniyyət və Turizm Nazirliyindən APA-ya verilən məlumata görə, Azərbaycan Respublikası Prezidentinin “Azərbaycan Etnoqrafiya Muzeyinin yaradılması haqqında» 11 iyul 2008-ci il tarixli 2941 nömrəli sərəncamına əsasən, Abşeron rayonu Qobu qəsəbəsi ərazisində açıq səma altında Azərbaycan etnoqrafiya muzeyinin baş planının hazırlanması üzrə müsabiqə keçiriləcək.

Beynəlxalq müsabiqənin təşkilati və texniki şərtlərinə görə, təqdim olunan layihə milli irsimizin qorunması və gələcək nəsillərə çatdırılması, Azərbaycan xalqının keçmişini və bu gününü özündə yaşatmaqla onun milli simasını müəyyən edən xarakterik həyat tərzinin, məişət və mərasim xüsusiyyətlərinin, xalq yaradıcılığı formalarının dolğun mənzərəsinin canlandırılması sahəsində misilsiz əhəmiyyəti olacaq belə bir muzeyin yaradılması gənc nəslin yüksək vətənpərvərlik, adət-ənənələrə bağlılıq və tarixi-mədəni dəyərlərə ehtiram ruhunda tərbiyə olunmasına xidmət etməlidir. Abşeron rayonunun Qobu qəsəbəsində Mədəniyyət və Turizm Nazirliyinin daimi istifadəsinə verilmiş 200 hektar sahəsi olan ərazidə yaradılacaq bu muzeydə xalq mədəniyyətinin bütün nümunələri bir-birini tamamlayan səpgidə yerləşdirilməlidir.

Respublikanın bütün bölgələrindən toplanmış xalq yaşayış ev tipləri, təsərrüfat tikililəri, su və yel dəyirmanları, sənətkarlıq emalatxanaları, xalq sənətkarlıq növlərini əks etdirən eksponatlar, xalq nəqliyyat vasitələri, əhalinin məişətdə, əkinçilikdə, heyvandarlıqda, arıçılıqda və digər sahələrdə istifadə etdiyi alət və avadanlıqlar, evlərin daxili sahmanı üçün əşyalar və Azərbaycan xalqının qədim və zəngin mədəniyyətinin, adət-ənənələrinin qorunub saxlanılmasına, təbliğ olunmasına və gələcək nəsillərə çatdırılmasına xidmət edən digər eksponatlar Azərbaycan Etnoqrafiya Muzeyinin əsasını təşkil etməlidir. Muzeyin yaradılması prosesində açıq səma altında muzeylərin təşkili sahəsində dünyanın ən nümunəvi muzeylərinin iş təcrübəsi, etnoqrafik muzeyşünaslıq sahəsində elmin son nailiyyətləri nəzərə alınmalıdır. Gələcək muzeyin sahəsi Azərbaycanın bütün tarixi-etnoqrafik bölgələrini, ümumilikdə “Miniatür Azərbaycanı” xatırlatmalıdır.

Layihələr 2010-cu ilin 1 aprel tarixinədək Mədəniyyət və Turizm Nazirliyinə təqdim edilməlidir. Müsabiqənin qalibləri üçün hər biri müvafiq olaraq 60 min, 40 min və 20 min manat məbləğlərində 1-ci, 2-ci və 3-cü dərəcəli mükafatlar təsis edilir.
Müsabiqənin qalibi elan edilmiş işlər dövlət mülkiyyəti sayılmaqla, Azərbaycan Respublikasının Mədəniyyət və Turizm Nazirliyin istifadəsinə verilir.