Mədəniyyət siyasəti

Ana səhifə

Mədəniyyət siyasəti

Sabah “Sumqayıt şəhərinə həsr olunmuş ən yaxşı mahnı” müsabiqəsinin qalibləri mükafatlandırılacaq

09 noyabr 2009 09:12 (UTC +04:00)

Bakı – APA. Sabah Sumqayıt şəhərinin yaradılmasının 60 illiyi münasibətilə “Sumqayıt şəhərinə həsr olunmuş ən yaxşı mahnı” mövzusunda keçirilən müsabiqə qaliblərinin mükafatlandırma mərasimi keçiriləcək.

Sumqayıt şəhər İcra Hakimiyyətindən APA-ya verilən məlumata görə, Azərbaycan Bəstəkarlar İttifaqının (ABİ) Sumqayıt şəhər Mədəniyyət və Turizm İdarəsi ilə birgə keçirdiyi müsabiqəyə Sumqayıtdakı Bülbül adına Uşaq İncəsənət Məktəbində yekun vurulacaq.

Qeyd edək ki, Bəstəkarlar İttifaqının katibi, tanınmış bəstəkar, əməkdar incəsənət xadimi Eldar Mansurovun rəhbərlik etdiyi, əməkdar incəsənət xadimləri, bəstəkar Mobil Babayev, musiqişünas Həcər Babayeva, ABİ-nin məsləhətçisi, musiqişünas Sevda Hüseynovadan ibarət münsiflər heyəti müsabiqəyə təqdim olunan 10 əsərin arasından qalibləri müəyyən edib. Musiqisi İlham Abdullayevə, sözləri Vahid Əzizə məxsus olan “Sumqayıt lövhələri” əsəri I yerə layiq görülüb. Münsiflər heyətinin qərarına görə, Ədviyyə Rəhmətovanın Zivər Ağayevanın sözlərinə bəstələdiyi “Sumqayıt”, musiqisi və sözləri Emil Murada məxsus olan “Gözəl Sumqayıt” mahnıları II, musiqisi Nərminə Nağıyevaya, sözləri isə Qafqaz Əvəzoğluna məxsus olan “Sumqayıtım” mahnısı isə III yeri qazanıblar.

Qeyd edək ki, müsabiqədə qalib gələn əsərlər Sumqayıt şəhərinin 60 illiyinə həsr olunan qala-konsertdə ifa ediləcək.