Mədəniyyət siyasəti

Ana səhifə

Mədəniyyət siyasəti

Heydər Əliyev Fondu “Azərbaycan muğamları” layihəsi çərçivəsində yeni nəşrlərin təqdimatını keçirib - FOTOSESSİYA

Heydər Əliyev Fondu “Azərbaycan muğamları” layihəsi çərçivəsində yeni nəşrlərin təqdimatını keçirib - <font color=red>FOTOSESSİYA</font>

11 noyabr 2009 13:50 (UTC +04:00)

Bakı. Laçın Sultanova-APA. Heydər Əliyev Fondu “Azərbaycan muğamları” layihəsi çərçivəsində yeni nəşrlərin təqdimatını keçirib. APA-nın məlumatına görə, fondun prezidenti Mehriban Əliyeva bildirib ki, 8 diskdən ibarət “Azərbaycan muğamı” multimedia toplusu muğama dair ilk tədris vəsaitidir, muğam ifaçılığı üzrə müəllimlər, ustadlar üçün bir dərslikdir: “Heç bir dərslik canlı ünsiyyəti əvəz edə bilməz, ifa sirləri əvəzsizdir, canlı təmas və ünsiyyət mütləq lazımdır” deyən Mehriban Əliyeva bildirib ki, Azərbaycanda muğam sənəti öz xüsusi yerini qoruyub və saxlayıb.

“Muğam aləmi” adlanan ikinci layihə bu il Bakıda keçirilmiş Birinci Beynəlxalq Muğam Festivalını özündə əks etdirir, bu layihə 33 diskdən ibarətdir: “Bu Festival bir daha sübut etdi ki, muğam Azərbaycanın milli sərvəti olmaqla yanaşı dünya musiqi xəzinəsinin incisidir, muğam hüdudsuz bir məkandır və onun paytaxtı Bakıdır”. Mehriban Əliyeva bildirib ki, İkinci Beynəlxalq Muğam Festivalı Bakıda 2011-ci ildə keçiriləcək.

Bəstəkarlar İttifaqının sədri Firəngiz Əlizadə təqdimatı keçirilən layihələri son dərəcə vacib layihələr adlandırıb. Azərbaycan muğamını əlçatmaz zirvə adlandıran bəstəkar deyib ki, İkinci Beynəlxalq Muğam Festivalının hazırlığına indidən başlamaq lazımdır: “Bu tədbiri keçirmək daha çətin olacaq, çünki biz ən parlaq nümunələri artıq təqdim etmişik, indi yenilərini göstərməliyik, bunun üçün isə yeni tərtibat, yeni rejissura işi, yeni musiqi işi, yeni sintez göstərməliyik”.

Xalq artisti Arif Babayev hazırda muğama göstərilən qayğını çox yüksək qiymətləndirib. Onun sözlərinə görə, əvvəlki dövrlərdə gənc ifaçılar üçün belə şərait yaradılmayıb: “Qarabağ xanəndələrinin səslərini diskə köçürüb xalqa təqdim etmək çox böyük və təqdirəlayiq bir işdir”. Arif Babayev Muğam Mərkəzinin yaradılmasını çox vacib hadisə adlandırıb: “Mərkəzdə tanınmış xanəndələrin büstləri var. Arzu edərdim ki, hazırda həyatda olan ustadların da büstləri elə onların sağlığında quraşdırılsın”.

Birinci Beynəlxalq Muğam Festivalının qalibi Təyyar Bayramov gənc muğam ifaçıları üçün yaradılmış şərait və imkanlar üçün ölkə başçısı İlham Əliyev və Heydər Əliyev Fondunun prezidenti Mehriban Əliyevaya minnətdarlığını bildirib: “Festival sübuta yetirdi ki, Azərbaycan muğamı daha zəngin və daha müdrikdir”.

Daha sonra tədbirdə “Azərbaycan muğamı” sənədli filmi nümayiş etdirilib.