Mədəniyyət siyasəti

Mədəniyyət siyasəti

Azərbaycan nümayəndələri UNESCO-nun Dünya İrs Komitəsinin 35-ci sessiyasında iştirak ediblər

29 iyun 2011 14:34 (UTC +04:00)

Bakı. Ülkər Qasımova – APA. Parisdə UNESCO-nun qərargahında Dünya İrs Konvensiyasının həyata keçirilməsinə nəzarət edən Dünya İrs Komitəsinin 35-ci sessiyası keçirilib. Mədəniyyət və Turizm Nazirliyinin Beynəlxalq əlaqələr və mədəniyyət proqramları şöbəsindən APA-ya verilən məlumata görə, Azərbaycanın müşahidəçi qismində təmsil edilməsinin təmin olunması məqsədilə Mədəniyyət və Turizm Nazirliyinin nümayəndə heyəti, habelə Azərbaycanın UNESCO üzrə Milli Komitəsinin və UNESCO yanında Daimi nümayəndəliyimizin əməkdaşları iclasda iştirak ediblər.
İclasın açılış mərasimində Komitənin sədri Bəhreyn Krallığının Mədəniyyət naziri May Bint Muhəmməd Əl Xəlifə, UNESCO-nun icraçı katibi İrina Bokova və digərləri çıxış edərək Dünya İrs Konvensiyasının yaranmasından, həmin tarixdən keçən 40 il ərzində UNESCO tərəfindən görülmüş işlərdən bəhs edib, Konvensiyanın bəşəriyyətin gələcəyi üçün oynadığı mühüm rolu qeyd ediblər. 10 gün ərzində Dünya İrs Komitəsi tərəfindən 169 ədəd dünya irsinə baxılıb. Onların 34-ü Təhlükədə olan Dünya İrs siyahısında, 37 ədədi Dünya İrs Siyahısına qəbul edilmək üçün irəli sürülüb, digərləri isə artıq Dünya İrs Siyahısında olan və onların qorunması üçün yerləşdikləri ölkələr tərəfindən görülən işlərin nəzərdən keçirilməsi üçün iclasın gündəliyinə daxil edilib və Dünya İrs Komitəsi davam edən müzakirələrdən sonra 25 ədəd yeni ərazini UNESCO-nun Dünya İrs siyahısına, 2 ədəd abidə Təhlükədə olan Dünya İrs Siyahısına daxil ediliblər. Bir ədəd ərazi isə (Manas Wildlife Sanctuary (India) görülmüş tədbirlər nəticəsində Təhlükədə olan Dünya İrs Siyahısından çıxardılaraq Dünya İrs Siyahısına əlavə edilib.

Beləliklə də məlum olur ki, 1972-ci ildə qəbul edilmiş Dünya İrs Konvensiyasının 40 illiyi ərəfəsində Dünya İrs Siyahısında 936 ədəd ərazi və abidə mövcuddur. Onlardan 183-ü təbii, 725-i mədəni, 28 ədədi isə qarışıq ərazi və abidələrə aid edilir. İclasın son günü 2012-ci ildə keçiriləcək Dünya İrs komitəsinin 36-cı sessiyasının gündəliyi qəbul edilib.

Məlumatda bildirilib ki, iclas zamanı UNESCO-nun Dünya İrsinin İlkin siyahısında olan 6 ədəd Azərbaycan tarixi abidəsi Dünya İrs Siyahısına daxil edilməsi üçün lazım olan prosedurlar, digər ölkələrin təcrübələri öyrənilib, digər ölkələrin nümayəndələri ilə qeyri-rəsmi görüşlər keçirilib və gələcəkdə Azərbaycanın Dünya İrs Komitəsinə üzv seçilməsi üçün müvafiq təşviqat işləri aparılıb.

UNESCO _ Azərbaycan