Mədəniyyət siyasəti

Mədəniyyət siyasəti

Bakıda “Davamlı inkişaf mədəniyyəti: formalaşma problemləri və perspektivləri” adlı Beynəlxalq Elmi Konfrans keçirilir - FOTO

Bakıda “Davamlı inkişaf mədəniyyəti: formalaşma problemləri və perspektivləri” adlı Beynəlxalq Elmi Konfrans keçirilir - <font color=red>FOTO</font>

11 iyul 2011 09:34 (UTC +04:00)

Bakı. Ülkər Qasımova – APA. Bu gün Bakıda Muzey Mərkəzində “Davamlı inkişaf mədəniyyəti: formalaşma problemləri və perspektivləri” adlı Beynəlxalq Elmi Konfrans keçirilir. APA-nın məlumatına görə, tədbirdə çıxış edən mədəniyyət və turizm naziri Əbülfəs Qarayev konfransın mədəniyyət siyasətinin həyata keçirilməsində elmin iştirakını təmin etmək, habelə ölkədə mədəniyyət təzahürlərinin təhlilinə həsr olunan tədqiqatların dəstəklənməsi məqsədilə keçirildiyini vurğulayıb. Nazir bildirib ki, bu cür tədbirlərin təşkili mədəniyyətlərarası sivilizasiyaların inkişaf etdirilməsinə xidmət edir: “Bildiyiniz kimi, nazirliyin nəzdində nəzəri və elmi mərkəzlər mövcuddur. Mərkəzlərin iştirakı ilə də bir sıra müxtəlif mövzularda tez-tez konfranslar keçiririk. Lakin bu beynəlxalq konfrans davamlı inkişafın mədəniyyətinə həsr olunub”.

Nazir həmçinin vurğulayıb ki, konfransda qloballaşan sosial problemlər, mədəni proseslərin necə və hansı istiqamətə yönəlməsi müzakirə olunacaq: “Bugünkü tədbirdə 5 ölkənin nümayəndəsi iştirak edir. Təxmini coğrafiya onu göstərir ki, burada müzakirə olunacaq məsələlər ölkəmizin bütün regionuna xas olan problemlərdir. Sözsüz ki, nəzəriyyəsiz bu mədəni inkişafın təminatı mümkünsüzdür”.

Elmi konfransda UNESCO üzrə Azərbaycan Milli Komissiyasının birinci katibi Günay Əfəndiyeva “Davamlı inkişafın formalaşmasında UNESCO proqramlarının rolu” mövzusunda çıxış edib. O bildirib ki, müasir dövrümüzün ən aktual məsələlərindən biri və son dövrlər həyatın ayrı-ayrı sferaları ilə bağlı leksionumuzda ən çox istifadə edilən terminlərdən biri məhz “davamlı inkişaf termini”dir: “Davamlı inkişafın mühüm əhəmiyyət kəsb etməsi, həyatın bütün sferalarını əhatə etməsi, həmçinin inkişafın davamlılığına nail olunmasında təhsil, elm və mədəniyyətin əhəmiyyətli rol oynaması sözügedən məsələnin UNESCO-nun daim diqqət mərkəzində olmasına səbəb olub. UNESCO-nun fəal üzvlərindən biri kimi Azərbaycan da davamlı inkişaf məsələsinə, davamlı inkişaf mədəniyyətinin formalaşdırılmasına, eyni zaman bu mədəniyyətin təsdiqində böyük önəm verir”.

Konfransda UNESCO üzrə ekspert Nizami Məmmədov, Sankt-Peterburq Akademiyasının professoru Sergey Alekseyev, Müəllif Hüquqları Agentliyinin sədri Kamran İmanov və başqaları çıxış ediblər.

Konfransda Rusiya, Ukrayna, Belorus və Litvadan tanınmış elmi qurumlar və müvafiq ali məktəblər təmsil olunur.

Qeyd edək ki, “Davamlı inkişaf mədəniyyəti: formalaşma problemləri və perspektivləri” adlı Beynəlxalq Elmi Konfransı sabah da işini davam etdirəcək.