Mədəniyyət siyasəti

Ana səhifə

Mədəniyyət siyasəti

Azərbaycanın mədəniyyət və turizm naziri Türkiyə mediasının nümayəndələri ilə görüşüb

20 iyul 2011 08:37 (UTC +04:00)

Bakı. Ülkər Qasımova – APA. Türkiyənin bir sıra aparıcı qəzetlərinin nümayəndələri Azərbaycanda səfərdədir. APA-nın xəbərinə görə, heyətə qardaş ölkənin yüksək tirajlı mətbu orqanlarından “Hürriyet”, “Hürriyet Daily News”, “Zaman”, “Todays Zaman”, “Star” və “Radikal” qəzetlərinin təmsilçiləri daxildir.

Azərbaycanın Türkiyədəki səfirliyinin təşəbbüsü ilə həyata keçirilən səfərdə məqsəd Azərbaycanın tarixi, mədəniyyəti, çağdaş siyasəti, iqtisadi potensialı, Dağlıq Qarabağ problemi və onun ağır nəticələrinin Türkiyə ictimaiyyətinə daha ətraflı şəkildə təqdim olunmasında qardaş ölkə mediası ilə daha sıx əməkdaşlığı təşviq etməkdir. İyulun 22-dək davam edəcək səfər çərçivəsində türkiyəli jurnalistlərin dövlət və hökumət qurumlarında görüşləri də nəzərdə tutulub.

Bu gün mədəniyyət və turizm naziri Əbülfəs Qarayev türkiyəli jurnalistlərlə görüşüb. Nazirliyin mətbuat katibi İntiqam Hümbətov APA-ya bildirib ki, nazir Azərbaycan-Türkiyə tərəfdaşlığının güclənməsində medianın mühüm rolunu vurğulayıb. Ə. Qarayev Azərbaycanla Türkiyə arasında mədəniyyət və turizm sahəsində əlaqələrin genişlənməsindən söhbət açıb. Daha sonra o, Ermənistanın hərbi təcavüzündən danışaraq bu təcavüzün Azərbaycanın mədəniyyətinə, incəsənətinə qarşı da yönəldiyini vurğulayıb. Nazir ermənilərin milli musiqimizi, tarixi abidələrimizi, hətta milli yeməklərimizi öz adlarına çıxmağa çalışdıqlarını da Türkiyə mediasının nəzərinə çatdırıb.

Türkiyənin media təmsilçiləri Azərbaycana gələn turistlərin sayı, turizm sektorunda atılan addımlar, həmçinin 2012-ci ildə Bakıda keçiriləcək “Eurovision” mahnı müsabiqəsinə hazırlıqla bağlı görülən işlərlə də maraqlanıblar.

əbülfəs_qarayev