Mədəniyyət siyasəti

Ana səhifə

Mədəniyyət siyasəti

Əbülfəs Qarayev: “Mən 65 yaşına çatmış dəyərli mütəxəssislərin işdə saxlanmasının tərəfdarıyam”

14 sentyabr 2011 11:35 (UTC +04:00)

Bakı. Ülkər Qasımova – APA. Mədəniyyət və Turizm Nazirliyi qanuna uyğun olaraq 70 yaşına çatmış mütəxəssislərlə vidalaşmağa başlayıb. APA-nın mədəniyyət müəssisələrində neçə nəfərin təqaüdə göndərilməsi ilə bağlı sualını mədəniyyət və turizm naziri Əbülfəs Qarayev belə cavablandırıb: “Hazırda bu proses gedir. Yerlərdən gündəlik məlumatlar alıram. Bu proses prezidentin imzaladığı sərəncam əsasında aparılır. Biz qanuna riayət etməliyik. Lakin heç kim demir ki, biz bu insanların təcrübəsindən imtina etməliyik. Birincisi, onların bacarığı, biliyi varsa, hər hansı başqa formada işlərə müqavilə əsasında cəlb oluna bilərlər. Bizim özümüzdə də belə şəxslər rəsmən işdən gedib. Amma yenə də gəlib bizə yardım edirlər. Elələri də var ki, təqaüdə çıxıb öz nəvələri ilə məşğul olurlar. Bu proses davam edəcək”.

Nazir 65 yaşına çatmış dəyərli mütəxəssislərin işdə saxlanılmasının tərəfdarı olduğunu bildirib: “Mən 65 yaşa çatmış dəyərli mütəxəssislərin işdə saxlanmasının tərəfdarıyam. Hələlik bizdə böyük bir çətinlik yoxdur. Biz böyük təcrübə, bilik, savad və bacarıq toplamış insanlara hörmətlə yanaşmalı və onlardan səmərəli istifadə etməliyik. Lakin yenə deyirəm, qanun qanundur, onu icra etməyə borcluyuq”.

Paytaxt və region kitabxanalarında yeni iş üsuluna keçildiyini söyləyən Ə.Qarayev bəyan edib ki, hazırda kitabxana işçilərinin müasir avadanlıqları öyrənmələri yolunda müvafiq addımlar atılır: “Yeni, müasir kitabxana texnologiyalarını bilməyən şəxslərin hamısının işdən çıxarılması düzgün olmaz. Bu yolla getsək, kitabxanalarda işləyən çoxlu insan işsiz qalacaq. Amma bununla bağlı işlər görülür. Biz ilk olaraq ali təhsili olmayan musiqi müəllimlərindən başladıq. Keçən ildən etibarən isə kitabxana şəbəkəsinin müasir texnologiyaya yiyələnməsi üçün xüsusi kurslar təşkil etdik. Amma sözsüz ki, bu, imtahan vasitəsilə olmalıdır. Əgər işçinin qavrama qabiliyyəti yoxdursa, kursdan uğurla keçmirsə, onun gələcəyini düşünməliyik. Dünya təcrübəsinin tələbidir ki, bu gün kitabxanalarda müasir texnologiyalar özünə yer tutmalıdır. Biz bu proqramı tədricən həyata keçiririk”.

əbülfəs_qarayev