Mədəniyyət siyasəti

Mədəniyyət siyasəti

Azərbaycan Çexiya ilə mədəniyyət sahəsində əməkdaşlıq edəcək - FOTO

Azərbaycan Çexiya ilə mədəniyyət sahəsində əməkdaşlıq edəcək - <font color=red>FOTO</font>

14 sentyabr 2011 12:05 (UTC +04:00)

Bakı. Ülkər Qasımova-APA. Bu gün mədəniyyət və turizm naziri Əbülfəs Qarayev Azərbaycanda səfərdə olan Çexiya Milli Kitabxanasının direktoru Tomas Bohm və Çexiya Milli Muzeyinin direktoru Maykl Lukerlə görüşüb. APA-nın məlumatına görə, görüşdə Mirzə Fətəli Axundov adına Milli Kitabxananın Direktoru Kərim Tahirov və Azərbaycan Tarixi Muzeyinin direktoru Nailə Vəlixanlı da iştirak edib.

Əbülfəs Qarayev Ümumdünya Mədəniyyətlərarası Dialoq Forumu çərçivəsində Çexiyanın mədəniyyət naziri İrji Besserlə görüşünü xatırladıb və bildirib ki, məhz həmin görüşdə kitabxana və muzey sahəsində əməkdaşlıq etmək qərarı verilib. Kitabxana sahəsindəki problemlərdən danışan, bu sahəyə yeni gənc nəsli cəlb etməyin vacibliyini vurğulayan nazir kitabxana işçilərinin dünyagörüşünü dəyişməyin əhəmiyyətini qeyd edib. O, bu istiqamətdə Azərbaycanda xüsusi kurs və treninqlərin keçirildiyini bildirib: “Keçən yay bütün kitabxana rəhbərlərini kursa göndərdik, daha sonra onlar imtahandan keçdilər. Çünki kompüteri bilməyən kitabxana rəhbəri yeni texnologiyanı istifadə və tətbiq edə bilməyəcək”. Ə. Qarayev bəzi ölkə kitabxanalarında Azərbaycanla bağlı kitabların azlığından da şikayətlənib.

Azərbaycanın mədəniyyəti ilə tanışlıqdan məmnun qalan qonaqlar ölkəmizdə çox şeydən heyran qaldıqlarını deyiblər. Xüsusən də dünyada 52 milyon azərbaycanlının yaşaması xəbəri onlar üçün yeni olub. Görüş zamanı qarşılıqlı mütəxəssis, kitabxana informasiyası mübadiləsinin aparılması, hər iki ölkədə sərgilərin keçirilməsi və növbəti mərhələdə Azərbaycan nümayəndə heyətinin Çexiyaya səfər etməsi qərara alınıb.

Sonda qonaqlara Azərbaycan və Avropa mədəniyyətini özündə əks etdirən xatirə hədiyyəsi təqdim olunub.