Mədəniyyət siyasəti

Ana səhifə

Mədəniyyət siyasəti

Moskvada Müslüm Maqomayevin abidəsinin təntənəli açılış mərasimi keçirilib - FOTO

Moskvada Müslüm Maqomayevin abidəsinin təntənəli açılış mərasimi keçirilib - <font color=red>FOTO</font>

15 sentyabr 2011 13:42 (UTC +04:00)

Moskva. Fərid Əkbərov - APA. Rusiya Federasiyasının paytaxtı Moskva şəhərində Müslüm Maqomayevin abidəsinin açılış mərasimi keçirilib. APA-nın Moskva müxbirinin verdiyi məlumata görə, unudulmaz sənətkarın abidəsi heykəltəraş Aleksandr Rukavişnikov və Rusiyanın xalq rəssamı İqor Voskresenski tərəfindən hazırlanıb və şəhərin mərkəzində yerləşən Azərbaycan səfirliyinin qarşısındakı parkda ucaldılıb. Abidənin hündürlüyü səki ilə bərabər 4 metrə yaxındır.

Açılış mərasimində Moskva şəhərinin vitse-meri Lüdmila Şvetsova, Müslum Maqomayev Mədəni İrsi Fondunun təsisçisi, iş adamı Araz Ağalarov, Heydər Əliyev Fondunun vitse-prezidenti Leyla Əliyeva, Müslüm Maqomayevin həyat yoldaşı Tamara Sinyavskaya, Azərbaycanın mədəniyyət və turizm naziri Əbülfəz Qarayev, Rusiyanın mədəniyyət və incəsənət xadimləri iştirak ediblər.

A. Ağalarov və L. Şvetsova abidənin açılışını ediblər. L. Şvetsova çıxışında şəhərin mərkəzində unudulmaz sənətkarın abidəsinin açılışının mühüm hadisə olduğunu bildirib: “Müslüm Maqomayev SSRİ-nin meqa-ulduzu olub. Azərbaycan onun atası, Rusiya isə anasıdır. Müslüm 20 yaşında Kreml səhnəsində çıxış edib və bundan sonra bütün dünya onu tanıyıb. 31 yaşında SSRİ xalq artisti adını alıb”.

Rusiyanın xalq artisti Yevgeni Gerasimov çıxışında abidənin yaradıcılarına təşəkkürünü bildirib: “Bakıdakı abidə doğrudan da möhtəşəmdir. Hər zaman fikirləşirdim ki, görəsən Moskvada ucaldılan abidə necə olacaq. Bu gün burda ucaldılan abidənin də möhtəşəmliyini gördüm”.

Əbülfəz Qarayev çıxışında bugünün Moskva sakinləri və azərbaycanlılar üçün əlamətdar gün olduğunu söyləyib. Nazir Azərbaycan prezidenti İlham Əliyevin mərasim iştirakçılarına təbrikini çatdırıb və abidənin yaradılmasında əməyi olan hər kəsə təşəkkür edib.

Mərhumun həyat yoldaşı Tamara Sinyavskaya mərasimə gələnlərin qarşısında baş əydiyini bildirib: “Mən çox şadam ki, Müslüm Maqomayev bu gün ürəklərdə yaşayır, onun musiqisi ürəklərdə səslənir”.