Mədəniyyət siyasəti

Ana səhifə

Mədəniyyət siyasəti

Gənc Tamaşaçılar Teatrında mərhum rejissor İrina Perlova anılıb

15 sentyabr 2011 14:11 (UTC +04:00)

Bakı. Ülkər Qasımova – APA. Azərbaycan Dövlət Gənc Tamaşaçılar Teatrında quruluşçu rejissor, xalq artisti İrina Aleksandrovna Perlovanın anım mərasimi keçirilib. APA-nın məlumatına görə, mərhum rejissorun vəfat etməsinin ildönümünə həsr edilmiş mərasimdə onun şeirlərindən ibarət kitabın təqdimatı da olub.

Teatrın direktoru, əməkdar artist Mübariz Həmidov çıxışında sənətkarların adi insanlardan fərqləndiklərini, bu fərqin həmin sənətkarların dünyalarını dəyişdikdən sonra daha qabarıq şəkildə hiss olunduğunu söyləyib. Teatrın baş rejissoru, xalq artisti Cənnət Səlimova insanın adının onun dediyi sözlər, yazdığı kitablarla əbədiləşdiyini, gələcək nəsillər tərəfindən hər zaman anılaraq yad edildiyini vurğulayıb.

Daha sonra İ. Perlovaya həsr edilən “Sonuncu məkan” verilişi nümayiş etdirilib. Sonda mərhum rejissorun qızı tədbiri təşkil edən hər kəsə dərin minnətdarlığını bildirib.

Xatırladaq ki, 1991-ci ildə Bakı Kamera Teatrı fəaliyyətə başlayanda rejissor kimi dünya klassikasından 20 tamaşaya quruluş verən İ. Perlova beynəlxalq teatr festivallarında diplomlara və “Qızıl” medallara layiq görülüb. Azərbaycan milli teatr sənəti sahəsindəki xidmətlərinə görə o, 1981-ci ildə əməkdar artist, 2002-ci ildə xalq artisti fəxri adlarına layiq görülüb. İ. Perlova 2002-ci ildən prezident təqaüdçüsü idi.