Mədəniyyət siyasəti

Mədəniyyət siyasəti

“Sarı gəlin”, Yallı, “Kitabi Dədə-Qorqud”, “Koroğlu” dastanları Azərbaycanın qeyri-maddi mədəni irs nümunələrinin dövlət reyestrinə daxil edilib

21 sentyabr 2011 09:32 (UTC +04:00)

Bunu APA-ya açıqlamasında Mədəniyyət və Turizm Nazirliyinin Mədəniyyət siyasəti şöbəsinin Qeyri-maddi mədəni irs sektorunun müdiri Yaşar Hüseynli deyib.

Y. Hüseynli bildirib ki, dövlət reyestrinə salınan 4300-dən artıq nümunənin pasportlaşdırılması və Azərbaycana məxsusluğu haqqında şəhadətnamə verilməsi prosesi xüsusi kodlar vasitəsilə həyata keçiriləcək: “Dövlət reyestrinə salınan hər bir nümunənin ayrıca kodu var və məhz bu kodla reyestrdə yerini tutur. Nümunələrə veriləcək pasportlarda tarixi məlumatlar yer alacaq. Pasportun üzərində bu sözlər yazılacaq – “Azərbaycan qeyri-maddi mədəni irs nümunəsinin elementar pasportu Mədəniyyət və Turizm Nazirliyi tərəfindən verilir”. Pasportda göstəriləcək ki, Azərbaycanın qeyri-maddi mədəni irs nümunələri dövlət reyestrində rəsmi qeydiyyata alınıb. Reyestr kodu da qeyd olunacaq. Pasportda nümunənin adı, reyestr kodu, kateqoriyası, qrupu, növü, janrı, tərifi/təsviri, tərkibi/təsnifatı, tarixi/orialı, pasportu verən orqanın adı, pasportun verilmə tarixi, nazirin imzası və möhür qoyulacaq. Nümunələrə veriləcək pasportlar aidiyyəti qurumlarda, mədəniyyət sahəsinə aid olanlar da Mədəniyyət və Turizm Nazirliyində saxlanılacaq”.

Y. Hüseynli onu da əlavə edib ki, hansı ölkəyə məxsusluğu ilə bağlı bir çox iddialar olan nümunələrin hər birinin Azərbaycana məxsusluğunu sübuta yetirən materiallar var və lazım gəldikdə bu materiallardan istifadə olunacaq: “Digər ölkələr əgər bizim nümunələri mənimsəsələr, o zaman məsələ hüquqi müstəviyə keçəcək. Dövlət reyestrinin anlamı odur ki, biz bunun bütün hallarda Azərbaycana məxsus olduğunu dövlət olaraq sübut edirik və qeydiyyata alırıq. Dövlət reyestrinə salınan Azərbaycanın qeyri-maddi mədəni irs nümunələrinin hər biri dünya səviyyəsində təsdiq olunacaq. Bu qeyri-maddi mədəni irs elə bir şeydir ki, maddi abidələrdən, müəllifi olan nümunələrdən fərqli olaraq bunun kimə məxsus olduğunu sübut etmək mürəkkəb məsələdir. Azərbaycan bütün bu nümunələri öz üzərinə götürür və istər beynəlxalq, istərsə də yerli səviyyədə onun hüquqlarını müdafiə etməlidir”.

Sektor müdiri bildirib ki, dövlət reyestrinə aşıq mahnıları, saz havaları, duetlər, nəfəs çalğı alətləri, muğamlar, “Saçları burma”, “Sarı bülbül”, “Sevgili yar”, “Sarı gəlin”, “Sevirəm səni”, “Sona bülbüllər”, “Sudan gələn sürməli qız”, “Sular sonası”, “Süsən-sünbül” və digər Azərbaycan mahnıları, dastanlardan “Abbas və Gülgəz”, “Abdulla və Cahan”, “Aşıq Qərib”, “Əsli və Kərəm”, “Leyli və Məcnun”, “Fərhad və Şirin”, “Qurbani”, tənək dolmasından tutmuş bütün dolma növləri daxil edilib. Onun sözlərinə görə, nümunələr üçün ayrıca sayt hazırlanacaq və müxtəlif dillərdə fəaliyyət göstərəcək. Eyni zamanda hər bir nümunə haqqında ayrıca kataloq yaradılacaq.