Mədəniyyət siyasəti

Ana səhifə

Mədəniyyət siyasəti

II Bakı Beynəlxalq kitab sərgi-yarmarkasının açılış mərasimi keçirilib - FOTOSESSİYA

II Bakı Beynəlxalq kitab sərgi-yarmarkasının açılış mərasimi keçirilib - <font color=red>FOTOSESSİYA</font>

28 sentyabr 2011 09:38 (UTC +04:00)

APA-nın məlumatına görə, mərasimi giriş sözü ilə baş nazirin müavini, xalq yazıçısı Elçin Əfəndiyev açıb. Hər kəsi bu kitab bayramı münasibətilə təbrik edən E. Əfəndiyev sərgi-yarmarkanın artıq bir ənənə halı aldığını deyib. Baş nazirin müavini deyib ki, yarmarkada sərgilənən kitablar vasitəsilə Azərbaycan xalqının tarixi, mədəniyyəti, ədəbiyyatı və bugünkü durumu ilə tanış olmaq mümkündür. Xalq yazıçısı çıxışında son illər milli və dünya ədəbiyyatı nümunələrinin latın qrafikası ilə nəşr olunmasının da əhəmiyyətini vurğulayıb.
Mədəniyyət və turizm naziri Əbülfəs Qarayev 3 gün davam edəcək sərgi-yarmarka çərçivəsində kitab təqdimatları, tanınmış yazarlarla görüşlər, ədəbi-bədii gecələr, simpoziumlar və müzakirələr keçiriləcəyini bildirib. Onun sözlərinə görə, 25 ölkəni əhatə edən tədbirdə 121 Azərbaycan, 135 beynəlxalq nəşriyyatın kitabları təqdim olunur. Nazir bu cür tədbirlərin regionlarda da təşkilinin planlaşdırıldığını qeyd edib.

Ə. Qarayev onu da deyib ki, Azərbaycan bir il ərzində 20 beynəlxalq kitab sərgi-yarmarkasında təmsil olunub. Kitablarımız birinci, ikinci, üçüncü mükafatla yanaşı, “Qran-pri”yə də layiq görülüb.

Daha sonra sərgiyə baxış keçirilib. Sərgi-yarmarkada son üç ildə ölkə nəşriyyatlarında, eləcə də ABŞ, Rusiya, İran, Türkiyə, Macarıstan, Makedoniya, Slovakiya, Belarus, Latviya, Moldova, Özbəkistan, Qırğızıstan, Tacikistan və digər xarici ölkələrdə nəşr edilən kitablar, nəşr məhsulları nümayiş etdirilir.

Qeyd edək ki, sərgi çərçivəsində “Heydər Əliyev Sarayı”, “Azərbaycan Dövlət Gənc Tamaşaçılar Teatrı”, “Azərbaycan Dövlət Kukla Teatrı”, “Azərbaycan Dövlət Film Fondu”, “Azərbaycan Dövlət Rus Dram Teatrı” kitablarının, 150 cildlik “Dünya ədəbiyyatı” seriyasından nəşri başa çatmış kitabların, Timuçin Əfəndiyevin “Mədəniyyətdə tarixilik və müasirlik” kitabının təqdimat mərasimləri, “Azərbaycanın dövlət müstəqilliyi və kitab sənətinin inkişafı” mövzusunda simpozium, “20 ilin ədəbi mənzərəsi” – Azərbaycanın dövlət müstəqilliyinin 20 illiyinə həsr olunmuş dəyirmi masa, Taras Şevçenko və Abdulla Tukaya həsr olunmuş ədəbi-bədii gecə, “Qızıl Kəlmə” Ədəbi Mükafatı laureatları və Gənc Ədiblər Məktəbinin üzvləri ilə görüşlər keçiriləcək. Bundan əlavə müxtəlif nəşriyyatların təşkilatçılığı ilə kitab təqdimatları və müəllif görüşləri nəzərdə tutulub.

Sərgi üç gün davam edəcək və sentyabrın 30-da başa çatacaq. Həmin gün Təşkilat Komitəsi tərəfindən ən yaxşı nəşriyyat və ən yaxşı kitab mükafatlandırılacaq.

kitab _sərgi _ yarmarka