Mədəniyyət siyasəti

Ana səhifə

Mədəniyyət siyasəti

Bəstəkarlar İttifaqında Cahangir Cahangirovun 90 illiyinə həsr olunmuş elmi konfrans keçirilib

11 oktyabr 2011 10:07 (UTC +04:00)

Bakı. Ülkər Qasımova – APA. Azərbaycan Bəstəkarlar İttifaqının Üzeyir Hacıbəyli adına Konsert Salonunda görkəmli bəstəkar, xalq artisti Cahangir Cahangirovun 90 illiyinə həsr olunmuş elmi konfrans keçirilib. APA-nın məlumatına görə, konfransda çıxış edən Bəstəkarlar İttifaqının sədri, xalq artisti Firəngiz Əlizadə Cahangir Cahangirovun həyat və yaradıcılığından, bəstəkarlıq məktəbində iz qoyduğundan söz açıb. O bildirib ki, Cahangir Cahangirovun yaradıcılığında xor musiqisi janrı əsas yer tutur. C. Cahangirov solist, xor və simfonik orkestr üçün “Arazın o tayında” vokal-simfonik poemasının, “Dostluq haqqında mahnı”, “Füzuli”, "Nəsimi" kantatalarının, “Sabir”, “Hüseyn Cavid-59”, “Böyük qələbə” oratoriyalarının, “Azad”, “Müğənninin taleyi” operalarının və digər əsərlərin müəllifidir.

Əməkdar incəsənət xadimi, professor İmruz Əfəndiyeva “Cahangir Cahangirovun yaradıcılığında novatorluq”, sənətşünaslıq üzrə fəlsəfə doktoru Gülarə Vəzirov “Cahangir Cahangirovun yaradıcılığına bir nəzər”, sənətşünaslıq üzrə fəlsəfə doktoru, dosent Leyla Məmmədova “Cahangir Cahangirovun yaradıcılığı Azərbaycan xor mədəniyyəti kontekstində” və digər mövzularda nitqlər söylənilib.

Konfransda əməkdar artist Yaqub Zorofçunun ifasında Cahangir Cahangirovun mahnıları səslənib.