Mədəniyyət siyasəti

Ana səhifə

Mədəniyyət siyasəti

Bakıdakı “Dostluq” kinoteatrına Mədəniyyət Mərkəzi statusu veriləcək – EKSKLÜZİV

Bakıdakı “Dostluq” kinoteatrına Mədəniyyət Mərkəzi statusu veriləcək – <font color=red>EKSKLÜZİV</font>

17 oktyabr 2011 11:59 (UTC +04:00)

Bakı. Ülkər Qasımova-APA. Azərbaycanda “Dostluq” kinoteatrına Mədəniyyət Mərkəzi statusu veriləcək. Bu barədə APA-ya açıqlamasında Mədəniyyət və Turizm Nazirliyinin kino şöbəsinin sektor müdiri Yusif Şeyxov məlumat verib. Sektor müdiri deyib ki, “Dostluq” kinoteatrında mədəniyyət mərkəzinə uyğun əsaslı təmir işləri aparılacaq: “”Dostluq” kinoteatrında yenidənqurma işləri aparıldıqdan sonra artıq mədəniyyət mərkəzi kimi fəaliyyət göstərəcək. Bildiyiniz kimi bu kinoteatrda hazırda Bakı Bələdiyyət Teatrı fəaliyyət göstərir. Təmirdən sonra “Dostluq” Mədəniyyət Mərkəzində həm teatr fəaliyyət göstərəcək, həm film nümayişləri təşkil olunacaq, konsertlər keçiriləcək, internet klub olacaq. Mədəniyyət Mərkəzi tamamilə müasir standartlara uyğun olaraq hazırlanacaq”.

Y. Şeyxov onu da deyib ki, ”Şəfəq” kinoteatrı da Pantomima Teatrı üçün yenidən qurulacaq. Həmin məkanın rəsmən Pantomima Teatrı adlandırılacaq. Nazirlik rəsmisi vurğulayıb ki, Azərbaycanda dünyada aparılan kino siyasətindən istifadəyə başlanılıb: “Kinoteatrlar özəl müəssisələrdir. Kino nümayişi biznes, sahibkarlıq sahəsidir. Biznesdə olduğu kimi burada da pul qazanırlar. Azərbaycanda da bu hal xarici ölkələrdən fərqlənə bilməz. Təcrübə göstərir ki, yalnız bu yolla əhalini film nümayişi xidməti ilə təmin etmək mümkündür. Bu o demək deyil ki, Mədəniyyət və Turizm Nazirliyi bu işdən əlini çəkir, dövlət də kino nümayişi sənayesi kənara buraxır. Bu gün paytaxt Bakıda artıq ticarət və əyləncə mərkəzləri inşa olunur, hər bir ticarət və əyləncə mərkəzlərində cinema-bulvar kinoteatr tipli kino komplekslər yaradılır. Bütün dünyada olduğu kimi kino nümayişi sahəsində özəl sektor inkişaf etdirilməlidir”.

Mədəniyyət və Turizm Nazirliyinin kino şöbəsinin müdiri Cahangir Məmmədli APA-ya deyib ki, hazırda yalnız “Nizami” Beynəlxalq Kino Festival Mərkəzi, mədəniyyət mərkəzi statusu veriləcək “Dostluq” və “Vətən” kinoteatrı Mədəniyyət və Turizm Nazirliyinin tabeliyindədir. Digər kinoteatrlar isə Əmlak Komitəsinin tabeliyinə keçib. C. Məmmədli onu da açıqlayıb ki, uzun müddətdir icarə şəklində fəaliyyət göstərən “Azərbaycan” kinoteatrı bu günlərdə nəhayət ki özəlləşdirilib. Eyni zamanda “Araz”, “Sevinc”, “Bakı” kinoteatrları da özəlləşdirilən obyektlər arasındadır. Azərbaycanda digər kinoteatrların da özəlləşdirilməsi nəzərdə tutulur. Bu kinoteatrların hansı sahədə fəaliyyət göstərməsinə isə obyektləri özəlləşdirən şəxslər qərar verəcək.

Kino şöbəsi müdiri qeyd edib ki, hər bir xarici ölkədə kinoteatrlar yalnız mərkəzdə yerləşir və bu Azərbaycan üçün də keçərli olmalıdır.