Mədəniyyət siyasəti

Ana səhifə

Mədəniyyət siyasəti

Əbülfəs Qarayev Bakıda keçirilən Beynəlxalq Musiqi Festivalında tamaşaçı azlığının səbəbini açıqlayıb

25 oktyabr 2011 14:53 (UTC +04:00)

Bakı. Ülkər Qasımova – APA. “Azərbaycanda keçirilən hər hansı beynəlxalq tədbir mədəniyyətimizə bir töhfə verir. Biz beynəlxalq musiqi festivallarından, bu tipli tədbirlərdən hansısa nəticə gözləməməliyik”. APA-nın məlumatına görə, bu sözləri jurnalistlərə açıqlamasında mədəniyyət və turizm naziri Əbülfəs Qarayev deyib.

Hazırda Bakıda keçirilən Beynəlxalq Caz Festivalı barədə danışan Ə. Qarayev, bu festivalda Azərbaycanı təmsil edən gənc caz ifaçıları Şahin Növrəsli və İsraf Sarabskinin artıq ustada çevrildiyini qeyd edib: “Hazırda davam edən Caz Festivalında Azərbaycan pianoçuları Şahin Növrəsli və İsfar Sarabskinin çıxışlarını dinləyərkən çıxışlarında çox irəliləyişlərin olmasının şahidi oldum. Onların artıq ustad səviyyəsinə qalxmasını görürəm. Bu olduqca böyük hadisədir. Düşünürəm ki, ənənəvi Caz Festivalının keçirilməsi Azərbaycan mədəniyyətinin XXI əsr dünya mədəniyyətinə aid olmasından xəbər verən bir tədbirdir”.

Nazir ötən ay Bakıda keçirilən Üzeyir Hacıbəyli adına Beynəlxalq Musiqi Festivalının tamaşaçı azlığı ilə bağlı sualı da cavablandırıb. Ə. Qarayev, bu festivalın klassik musiqi ilə bağlı olduğunu diqqətə çatdırıb: “Bu festival Azərbaycan klassik musiqisini əks etdirirdi. Klassik musiqini qavramaq, dinləmək qabiliyyəti çox böyük təbəqələrə malik deyil. Bu musiqini dinləmək üçün buna hazır olmaq lazımdır. Sözsüz ki, bunun səbəbi bu ola bilər. Amma qeyd etdiyiniz festivalda bütün musiqi məktəblərinin müəllim və şagird kollektivləri, əcnəbi qonaqlar maraqla iştirak edirdilər. Digər bir tərəfdən, Azərbaycan tamaşaçıları ölkəmizdə keçirilən beynəlxalq musiqi festivallarına vərdiş ediblər. İldə 3-4 dəfə böyük festivalların keçirilməsinə nail oluruq. İldən-ilə festivalların həcmi də, mahiyyəti də böyüyür”.

Nazir bu ilin dekabrında M. Rastropoviç adına Beynəlxalq Festivalın da keçiriləcəyini də xatırladıb.

Əbülfəs Qarayev