Mədəniyyət siyasəti

Ana səhifə

Mədəniyyət siyasəti

“Sübhün səfiri” bədii filminin Şəkidə aparılan çəkilişlərinə ara verilib

10 noyabr 2011 10:41 (UTC +04:00)

Bakı. Ülkər Qasımova - APA. Azərbaycan dramaturgiyasının banisi Mirzə Fətəli Axundovun 200 illik yubileyi münasibətilə çəkilən “Sübhün səfiri” bədii filminin Şəkidə aparılan çəkilişlərinə ara verilib. APA-nın məlumatına görə, buna hava şəraiti səbəb olub.

Şəkidə filmin bəzi əsas məqamları çəkilsə də, yaradıcı heyət hava şəraiti ilə əlaqədar çəkilişləri təxirə salmaq məcburiyyətində qalıb. Filmin quruluşçu rejissoru Ramiz Həsənoğlu Şəkidə çəkilişlərin gələn ilin martında davam etdiriləcəyini açıqlayıb: “Havalar qəflətən pisləşdi. Düzdür, Şəkidə on günə yaxın çəkilişlər apardıq, bəzi hissələri çəkdik. Amma o hava şəraitində filmi çəkə bilməzdik. Qərara gəldik ki, qayıdaq və çəkilişləri mart ayında davam etdirək. Çəkilişləri Bakıda davam etdirəcəyik, sonra İstanbul və Tiflisdə də çəkilişlər aparılacaq. Çəkiliş zamanı istər-istəməz fors-major halları olur. Bu halı da elə qəbul edirik”.

Filmin ssenari müəllifi xalq yazıçısı Anar, operatoru Kənan Məmmədov, bəstəkarı Cavanşir Quliyev, baş rəssamı Rafiz İsmayılov, rejissoru Akif Rüstəmov, icraçı prodüseri Adil Qulamov, geyim üzrə rəssamı Şahin Həsənlidir. Filmdə Mirzə Fətəli Axundovun gənclik dövrünü gənc aktyor Nicat Həbibov, 50 yaşından ömrünün sonuna kimi olan dövrü isə xalq artisti Rasim Balayev canlandırır. Filmdə Bakıxanov rolunda Fəxrəddin Manafov, Həsən bəy Zərdabi rolunda Məmməd Səfa, Lermontov rolunda Oleq Əmirbəyov çəkilirlər. Türkiyədə yaşayan azərbaycanlı aktrisa Məlahət Abbasova Tubu xanım rolunu oynayır.

Filmdə İlham Əsgərov, Bəxtiyar Xanızadə, Aleksandr Şarovski, Yuri Balıyev, Məbud Məhərrəmov, Rafiq Əliyev, Gülzar Qurbanova və başqaları da çəkilir. Film Mədəniyyət və Turizm Nazirliyinin sifarişi əsasında Cəfər Cabbarlı adına “Azərbaycanfilm” Dövlət Kinostudiyasında istehsal olunur.

Filmin 2012-ci ildə - M. F. Axundovun 200 illik yubileyinə qədər təhvil verilməsi nəzərdə tutulur.