Mədəniyyət siyasəti

Ana səhifə

Mədəniyyət siyasəti

Bakıda Uşaq və Gənclər Teatrları Beynəlxalq İcra Komitəsinin toplantısının bağlanış mərasimi keçirilib - FOTO

Bakıda Uşaq və Gənclər Teatrları Beynəlxalq İcra Komitəsinin toplantısının bağlanış mərasimi keçirilib - <font color=red>FOTO</font>

27 fevral 2012 10:30 (UTC +04:00)

Bakı. Ülkər Rəşidqızı-APA. Uşaq və Gənclər Teatrları Beynəlxalq İcra Komitəsinin (ASSİTEJ) toplantısının bağlanış mərasimi keçirilib. APA-nın məlumatına görə, mərasimdə çıxış edən Azərbaycan Dövlət Gənc Tamaşaçılar Teatrının direktoru, ASSİTEJ-in Azərbaycan Milli Mərkəzinin sədri Mübariz Həmidov toplantının hər iki tərəf üçün uğurlu nəticələr əldə olunmasında əhəmiyyətli olduğunu, toplantı çərçivəsində keçirilən seminar və treninqlərin öz müsbət təsirini göstərəcəyinə əminliyini diqqətə çatdırıb. Bağlanış mərasiminin Azərbaycanın ən faciəli günü olan Xocalı soyqırımının 20-ci ildönümünə təsadüf etdiyini qeyd edən M. Həmidov faciə haqqında qonaqlara ətraflı məlumat verib.

ASSİTEJ-in prezidenti İvetta Hardi toplantının faydalı nəticələrlə yekunlaşdığını, müzakirələrin səmərəli və uğurlu olduğunu dilə gətirərək yaradılan yüksək təşkilatçılıq işinə və Azərbaycanda onlara göstərilən diqqət və qayğıya görə Mədəniyyət və Turizm Nazirliyinə və Milli Mərkəzin rəhbərliyinə öz təşəkkürünü bildirib. Daha sonra toplantıda iştirak edən Almaniya, İslandiya, Hindistan və digər ölkələrin təmsilçiləri çıxışlarında Azərbaycan mədəniyyəti, teatr və musiqi sənətinin onları valeh etməsi barədə məftunluqla danışaraq, “Biz özümüz üçün Azərbaycan adlı yeni və əsrarəngiz bir ölkə kəşf etdik və bundan çox məmnun olduq” deyiblər.

Qeyd edək ki, fevralın 20-dən 26-dək davam edən ASSİTEJ-in İcra Komitəsinin toplantısı Mədəniyyət və Turizm Nazirliyi, Uşaq və Gənclər Teatrları Beynəlxalq Assosiasiyasının (ASSİTEJ) və Azərbaycan Dövlət Gənc Tamaşaçılar Teatrının birgə təşkilatçılığı ilə həyata keçirilib.