Mədəniyyət siyasəti

Ana səhifə

Mədəniyyət siyasəti

“Eurovision-2012” müsabiqəsində iştirakdan imtina - erməni təbliğat maşınının məğlubiyyətlə barışması – TƏHLİL

“Eurovision-2012” müsabiqəsində iştirakdan imtina - erməni təbliğat maşınının məğlubiyyətlə barışması – <font color=red>TƏHLİL</font>

07 mart 2012 13:38 (UTC +04:00)

Bakı. Vüqar Məsimoğlu-APA. Ermənistan prosesləri soyuq başla dəyərləndirən insanlar üçün sürpriz olmayan bir addım atıb, bu ölkənin İctimai Televiziyası mayda Bakıda keçiriləcək “Eurovision-2012” müsabiqəyə təmsilçi göndərməyəcəyini açıqlayıb. Bu qərara ilk reaksiya verən Avropa Yayım Birliyinin münasibəti də verilən qərarın bu qurum üçün sürpriz olmadığını göstərir. “Eurovision” mahnı müsabiqəsinin rəhbəri Yan Ola Sand bu qərardan təəssüfləndiyini bildirib və EBU-nun bütün səylərinə rəğmən Ermənistanın “Avropa Yayım Birliyindən asılı olmayan səbəblərə görə” belə qərar verdiyini deyib. Bu səbəblər hansılardır? Ermənistanın bir qayda olaraq əsas gətirdiyi təhlükəsizliklə bağlı problemlər? Yan Ola Sand əslində verdiyi ilk açıqlama ilə bu iddiaların yalnız bəhanə olduğunu dolayı yolla təsdiqləyib. Müsabiqəyə qatılan ölkələrin nümayəndə heyətlərinin, tamaşaçıların təhlükəsizliyinə birbaşa məsuliyyət daşıyan, buna görə ev sahibi olan ölkədən rəsmi qarantiya alan, verilən zəmanət əsasında müsabiqənin təşkilati işlərinə başlamağa qərar verən qurum Avropa Yayım Birliyidir. Yəni, təhlükəsizliyə qarantiya alınması EBU-nun boynuna düşən vəzifədir, EBU Azərbaycan hökumətindən bu qarantiyanı alıb və Yan Ola Sandın açıqlaması o deməkdir ki, Ermənistanın təhlükəsizlik məsələsinin uzun müddət gündəmdə saxlaması bəhanədir, ermənilər doğrudan da EBU-dan asılı olmayan səbəblərdən müsabiqədə iştirak etməmək qərarı veriblər. Bəs bu səbəblər hansılardır?

Bu suala cavab vermək üçün öncə Ermənistanın müsabiqədə iştirakla bağlı seçdiyi taktikanı, atdığı addımları təhlil etmək lazımdır. Yada salaq - Azərbaycan təmsilçiləri ötən il müsabiqədə qalib gəldikdən sonra ortaya çıxan ilk sual Ermənistanın müsabiqəyə iştirakı ilə bağlı idi. Bu məsələ bölgənin mövcud reallıqlarını dəyərləndirməyi bacarmayan avropalı üçün nə qədər əhəmiyyətsiz olsa da, 24 ildir aktiv münaqişə vəziyyətində olan Azərbaycan və Ermənistan cəmiyyətləri üçün bir o qədər aktual idi. Ermənistan ilk gündən bu aktuallığı dəyərləndirib, müsabiqədə iştirak məsələsi ətrafında süni gündəm yaratmaq taktikası yürüdüb. Məqsəd Azərbaycanın “Eurovision” müsabiqəsinə ev sahibliyindən əldə edəcəyi uğurların (söhbət maddi gəlirdən getmir) üzərinə kölgə salmaq idi. Təsadüfi deyil ki, erməni təbliğat maşını artıq bir neçə aydır Ermənistanın “Eurovision”da iştirakla bağlı tərəddüd keçirməsinin səbəbini təhlükəsizlik problemi ilə əlaqələndirməyə çalışır, Azərbaycana gedəcək nümayəndə heyəti, mətbuat nümayəndələri, müsabiqəni izləyəcək vətəndaşların təhlükəsizliyinə heç bir zəmanət olmadığını iddia etməklə məşğul olur. Lakin bu iddialar həm Azərbaycan rəhbərliyi, sonra müsabiqənin təşkilatçısı olan Avropa Yayım Birliyi tərəfindən heçə endirilib, hər iki tərəf müsabiqədə iştirak edəcək bütün nümayəndə heyətlərinin və şou-proqramı izləmək üçün Bakıya gələcək hər kəsin təhlükəsizliyinə ən yüksək səviyyədə qarantiya verildiyini açıqlayıb. “Eurovision-2012” mahnı müsabiqəsinə rekord sayda ölkənin qatılacağı məlum olduqdan sonra erməni təbliğat maşınının təhlükəsizliyin təmin olunmayacağı ilə bağlı iddiaları heçə endi, Ermənistan İctimai Televiziyası yekun qərarı açıqlamağı bir neçə dəfə təxirə salmasına rəğmən son nəticədə müsabiqəyə təmsilçi göndərəcəyini açıqlamağa məcbur oldu.

Ermənistanın tərəddüdləri doğrudanmı təhlükəsizlik problemləri ilə bağlı idi? Son illər bu ölkənin bir çox təmsilçiləri Bakıda keçirilən beynəlxalq tədbirlərdə iştirak ediblər və onların təhlükəsizliyi ilə bağlı heç bir problem yaşanmayıb. Bəs nə üçün ermənilər təhlükəsizlik məsələsinin bu qədər qabardırlar? Məntiqi nəticə budur - Ermənistan üçün “Eurovision-2012” müsabiqəsində iştirakın yeganə əhəmiyyəti Azərbaycan əleyhinə təbliğat kampaniyası aparmaqdır. Lakin bu dəfə bu təbliğat bütün istiqamətlərdə heçə çıxarıldığından artıq erməni tərəfinin müsabiqədə iştirakının heç bir mənası qalmayıb. Ermənistan Azərbaycanın qatıldığı bütün müsabiqələrdə mütləq təxribat törədib. Müsabiqəni izləyən erməni tamaşaçıların zalda qondarma “Dağlıq Qarabağ Respublikası”nın bayrağını yelləməsi, hazırladıqları şou-proqramda Azərbaycan və türk tamaşaçısını qıcıqlandıran elementlər daxil etməsi, ölkə üzrə səsvermənin nəticələrinin elan edən aparıcının əlində işğal altında olan ərazilərimizdəki “erməni abidələri”nin şəklini tutması hər kəsin yadındadır. Lakin ermənilərin bu təxribatları Bakıda edə bilməyəcəkləri məlum idi, buna nə müsabiqəyə ev sahibliyi edən Azərbaycan, nə də müsabiqənin təşkilatçısı olan Avropa Yayım Birliyi yol verməyəcəkdi. Bu səbəbdən müsabiqədə iştirak etməkdə yeganə məqsədi anti-Azərbaycan təbliğatı aparmaq olan Ermənistan üçün bütün bəhanələr tükəndiyi göz qabağındadır.

Digər tərəfdən ermənilər açıq-aşkar bu müsabiqənin ev sahibi Azərbaycana gətirəcəyi dividentləri həzm edə bilmir. İstənilən halda dünyada ən çox tamaşaçı auditoriyasına sahib müsabiqələr siyahısında ilk beşlikdə təmsil olunan “Eurovision” müsabiqəsi Azərbaycanın tanıtımında əvəzsiz rol oynayacaq. “Eurovision”un yarımfinal və final mərhələlərini müxtəlif hesablamalara görə 500 milyona yaxın tamaşaçı izləyir, bu isə dünyada hər 14 nəfərdən birinin yayımlanacaq reklam çarxları, təqdim olunacaq şou-proqram vasitəsilə Azərbaycan, ölkəmizin təbiəti, zəngin mədəniyyəti, musiqisi barədə məlumat əldə etməsi deməkdir. “Eurovision-2012” müsabiqəsi həm də Qərbdə uzun illərdir erməni təbliğat maşını vasitəsilə ölkəmiz haqqında formalaşdırılan əsassız təsəvvürləri heçə endirəcək. Bu kimi müsabiqələr geniş auditoriyaya sahib olması baxımından ictimai rəy formalaşdırmaq üçün əvəzsiz alətdir, bu alət vasitəsilə Qərb Azərbaycanı yenidən tanıyacaq. Yəni, Azərbaycanın “Eurovision-2012” müsabiqəsinə ev sahibliyi etmək şansından uğurla yararlanması həm də erməni təbliğat maşınının və ümumilikdə erməni diasporunun ilk ciddi məğlubiyyəti deməkdir. Bu qaçılmaz məğlubiyyətin iştirakçısı və şahidi olmaq istəməyən Ermənistan üçün müsabiqədə iştirakdan imtina onlar üçün yalnız kiçik bir təsəllidir.

Digər tərəfdən Dağlıq Qarabağ münaqişəsinin nizamlanması ilə bağlı danışıqlarda humanitar dialoqun ön plana çəkildiyi bir dövrdə Ermənistanın “Eurovision-2012” müsabiqəsində iştirakdan imtinası İrəvanın “xalq diplomatiyasının zəruriliyi” ilə bağlı iddialarının səmimi olmadığını göstərir. ATƏT-in Minsk Qrupu vasitəsilə aparılan son danışıqlarla hər iki ölkənin (yəni həm də Ermənistanın) qarşılıqlı etimad mühitinin formalaşdırılması üçün qarşılıqlı addımlar atmaqla bağlı üzərinə öhdəlik götürüb, artıq bu istiqamətdə ilk addım atılıb, dörd ildən sonra Moskvada Azərbaycan və Ermənistan ziyalılarının görüşü baş tutub və belə görüşlərin davamlı keçirilməsi barədə razılıq əldə olunub. “Eurovision-2012” müsabiqəsi humanitar dialoqun inkişaf etdirilməsi üçün ən münasib platforma sayıla bilər, Ermənistan müsabiqədə iştirakdan imtina etməklə münaqişənin nizamlanması ilə bağlı danışıqlarda nə qədər “səmimi” olduğunu bir daha təsdiqləmiş oldu.

Eurovision_Ermənistan