Mədəniyyət siyasəti

Ana səhifə

Mədəniyyət siyasəti

“Eurovision” mahnı müsabiqəsinin keçirilməsi ilə bağlı Təhlükəsizlik Konsepsiyası hazırlanıb

09 mart 2012 09:02 (UTC +04:00)

Bakı. Hafiz Heydərov-APA. Bakı şəhər Baş Polis İdarəsi bu ilin may ayında paytaxtda keçirilməsi nəzərdə tutulan “Eurovision-2012” mahnı müsabiqəsi ilə əlaqədar həyata keçiriləcək təhlükəsizlik tədbirləri ilə bağlı planını açıqlayıb.

APA-nın məlumatına görə, Bakı Şəhər Baş Polis İdarəsinin İctimai təhlükəsizlik idarəsinin rəisi, polis polkovniki Nurullah Məmmədxanlı “POLİS” qəzetinə açıqlamasında bildirib ki, 2011-ci il noyabrın 8-də Daxili İşlər Nazirliyində keçirilən əməliyyat müşavirəsində beynəlxalq tədbir zamanı ictimai qaydanın qorunması üçün görüləcək tədbirlər müəyyən edilib. Daxili işlər naziri, general-polkovnik Ramil Usubov müşavirədə bildirib ki, beynəlxalq tədbirin təşkilində daxili işlər orqanlarının üzərinə mühüm vəzifələr düşür. Bakı şəhərində beynəlxalq əhəmiyyətli tədbirlərin keçirilməsi ilk təcrübə deyil: “Paytaxtda dəfələrlə beynəlxalq konfranslar, idman yarışları keçirilib. Bu tədbirlərdə təhlükəsizliklə əlaqədar hər hansı problemi yaşanmayıb. Lakin iki aydan sonra keçiriləcək “Eurovision-2012” mahnı müsabiqəsi bir çox parametrlərinə görə fərqli tədbirdir”.

N. Məmmədxanlı qeyd edib ki, paytaxt polisinin təxminən 30 faizinin “Eurovision-2012”nin təhlükəsizliyini təmin etmək məqsədilə xidmətə cəlb edilməsi nəzərdə tutulub: “Təbii ki, müsabiqə zamanı polis gücləndirilmiş iş rejimində işləyəcək. İctimai təhlükəsizliyin təmin edilməsi üçün xüsusi tədbirlər planı tərtib edilib. Tədbirin keçiriləcəyi ərazilərdə, qonaqların yaşayacaqları və istirahət edəcəyi yerlərdə polis naryadlarının ayrılması nəzərdə tutulub. Eyni zamanda, hər bir əraziyə məsul şəxslər ayrılacaq. Hazırda tədbirlərin keçiriləcəyi rayonların elektron variantda xəritəsi, sxemi hazırlanır”.

N. Məmmədxanlı həmçinin bildirib ki, Bakı şəhərində keçirilmiş beynəlxalq əhəmiyyətli digər tədbirlərlə “Eurovision-2012”nin təhlükəsizliyinin təmin edilməsi baxımından ciddi fərq yoxdur: “Sadəcə, belə tədbirlərdən fərqli olaraq mahnı müsabiqəsinin keçirilmə vaxtı daha uzun müddətli olur. Polis təxminən bir ay gücləndirilmiş rejimdə işləyir. Elə buna görə də nəzərdə tutulmuş təhlükəsizlik tədbirlərinin miqyası böyükdür. Təbii ki, paytaxt polis belə irimiqyaslı tədbirin təhlükəsizliyinin təmini istiqamətində beynəlxalq təcrübədən yararlanmaq niyyətindədir. Bu məqsədlə “Eurovision” mahnı müsabiqəsinə ev sahibliyi etmiş bir neçə dövlətin təcrübəsi öyrənilir. Rusiya, Ukrayna və sonuncu olaraq müsabiqənin keçirildiyi Almaniyanın Düsseldorf şəhərində tətbiq edilmiş təhlükəsizlik tədbirləri öyrənilir. Daha çox Rusiyanın təcrübəsi öyrənilir, bununla bağlı artıq bu ölkənin rəsmiləri ilə görüşlər də keçirilib”.

N. Məmmədxanlı onu da qeyd edib ki, “Eurovision” mahnı müsabiqəsinin keçirilməsi ilə bağlı Təhlükəsizlik Konsepsiyası hazırlanıb. Bu konsepsiya Avropa Yayım Birliyinin təhlükəsizlik məsələləri ilə məşğul olan nümayəndələri tərəfindən də müsbət qiymətləndirilib. Ümumiyyətlə, təhlükəsizliyin təmin edilməsinə ciddi hazırlıq prosesi avropalılarda razılıq doğurub.

Eurovision