Mədəniyyət siyasəti

Ana səhifə

Mədəniyyət siyasəti

“Eurovision-2012” mahnı müsabiqəsinin açılış və interval aktlarının məşqləri başlayıb

01 may 2012 16:12 (UTC +04:00)

Bakı. Ülkər Rəşidqızı-APA. Azərbaycanın ev sahibliyi etdiyi “Eurovision-2012” mahnı müsabiqəsinə hazırlıqlar davam edir. “Eurovision-2012” İşçi Qrupundan APA-ya verilən məlumata görə, hazırda 57-ci “Eurovision” mahnı müsabiqəsi şousunun keçiriləcəyi “Baku Crystal Hall”da səhnə tərtibatı işləri tamamlanmaqdadır.

Mayın 13-dən “Baku Crystal Hall”nda “Eurovision” mahnı müsabiqəsində iştirak edən ölkələrin təmsilçilərinin məşqləri başlayacaq. Səhnə dizaynı, işıq effektləri, “Green Room”u ilə fərqlənəcək Bakıdakı “Eurovision” Mahnı Müsabiqəsi həm də açılış şousu və interval aktları ilə bütün Avropa izləyicilərinin böyük marağına səbəb olacaq. Artıq açılış şousu və interval aktlarının (ölkələrin çıxışından sonra səsvermə zamanı efirə yayımlanan şou) ssenarisi hazırdır. Artıq bu şoularda çıxış edəcək müğənnilər və qrupların məşqləri başlayıb. Məşqlər Bakının bir neçə məkanında - “Buta Palace”, Heydər Əliyev adına İdman-Konsert Kompleksi və digər konsert saraylarında aparılır. Ənənəyə uyğun olaraq, “Eurovision” mahnı müsabiqəsinə ev sahibliyi edən ölkə açılış və interval aktlarında adətən milli mədəniyyətini əks etdirən şoular təqdim edir. Bu baxımdan Bakı şousunda da tamaşaçılara Azərbaycanın zəngin musiqisi, mədəniyyəti ilə fərqli, milli adətlərlə müasirliyin sintezindən yaranan açılış və interval aktları təqdim olunacaq.

"Eurovision-2012”nin yarımfinalları və finalındakı açılış və interval aktları səhnə tərtibatı, ssenarisi və bu şouda çıxış edəcək müğənniləri ilə yadda qalacaq. Mayın 26-da keçiriləcək final mərhələsinin açılış və interval şousunda muğam ustadı Alim Qasımov, müğənni-bəstəkar Emin, “Natiq” ritm qrupu, Azərbaycan Dövlət Rəqs Ansamblı, xarici rəqs qrupları, eləcə də digər məşhur yerli və xarici müğənnilər çıxış edəcəklər. Yarımfinalların interval aktlarında isə ötən “Eurovision” müsabiqələrindən tanıdığımız məşhur müğənnilərin çıxışları, “Eurovision” ulduzlarından ibarət qrupun, eləcə də məşhur DJ-lərin şousunun təqdimatı nəzərdə tutulur.

Xatırladaq ki, “Eurovision-2012” mahnı müsabiqəsinin yarımfinallarının əsas məşqləri mayın 21, 23-də, yarımfinallar mayın 22-i və 24-də, final mərhələsinin əsas məşqi mayın 25-də, müsabiqənin finalı isə mayın 26-da olacaq.

Eurovision