Mədəniyyət siyasəti

Mədəniyyət siyasəti

Bakıda qeyri-maddi mədəni irsin inkişafı üzrə əməkdaşlıq beynəlxalq seminar keçiriləcək

21 sentyabr 2012 14:11 (UTC +04:00)

Bakı. Ülkər Rəşidqızı - APA. 24-26 sentyabr tarixlərində Bakıda “Muzey icmaları və dövlət qurumları arasında qeyri-maddi mədəni irsin mühafizəsi və inkişafı üzrə əməkdaşlıq” adlı beynəlxalq forum keçiriləcək.

Azərbaycan Xalçası və Xalq Tətbiqi Sənəti Dövlət Muzeyinin mətbuat xidmətindən APA-ya verilən məlumata görə, Mədəniyyət və Turizm Nazirliyi, UNESCO üzrə Azərbaycan Respublikasının Milli Komissiyası, Beynəlxalq Muzeylər Şurasının (ICOM) Azərbaycan Milli Komitəsi, “Azərbaycan Xalçaçıları” İctimai Birliyi və L.Kərimov adına Azərbaycan Xalçası və Xalq Tətbiqi Sənəti Dövlət Muzeyinin birgə təşkilatçılığı ilə keçiriləcək forumda Azərbaycan, Rusiya, Gürcüstan, Ukrayna ICOM Milli Komitələrinin nümayəndələri, həmçinin UNESCO-nun qeyri-maddi mədəni irs üzrə eksperti iştirak edəcək.

Forumun keçirilməsində məqsəd muzey icmasının və dövlət qurumlarının imkanlarının birləşdirilməsi üzrə qeyri-maddi mədəni irsin mühafizəsində və inkişafında əsas məsələlərin aşkar edilməsindən ibarətdir. Forum çərçivəsində Azərbaycanın UNESCO-ya daxil olunmasının 20 illik yubileyi qeyd olunacaq. ICOM Rusiya Milli Komitəsi Bakıda forum çərçivəsində Rusiyanın 20 aparıcı muzey direktorları və ICOM Rusiya Milli Komitəsinin prezidenti, Rusiya prezidentinin mədəniyyət məsələləri üzrə müşaviri V.İ.Tolstoyun iştirakı ilə öz rəyasət heyətinin iclasını da keçirəcək.

Tədbirdə UNESCO-nun Azərbaycan Milli Komitəsinin baş katibi Günay Əfəndiyeva “Azərbaycanla UNESCO arasında 20 illik əməkdaşlığın nəticələri və perspektivləri”, ICOM Azərbaycan Milli Komitəsinin sədri, L.Kərimov adına Azərbaycan Xalçası və Xalq Tətbiqi Sənəti Dövlət Muzeyinin direktoru Röya Tağıyeva “Xalça ənənələrinin dirçəlişi”, Rusiya Mədəniyyət Nazirliyinin Beynəlxalq Mədəni Əlaqələr departamentinin direktoru Yekaterina Selezneva “Qeyri-maddi mədəni irs”, ICOM Gürcüstan Milli Komitəsinin sədri İnqa Karaya “Qeyri-maddi mədəni irsin qorunmasında və interpretasiyasında muzeylərin rolu”, Musiqi Mədəniyyəti Dövlət Muzeyinin direktoru Alla Bayramova “Cəngin dirçəlişi”, Qobustan Milli Qoruğu Muzeyinin direktoru Məlahət Fərəcova “Qayalarda yazılanlar - Qobustan qoruğunun qayaüstü incəsənət abidələrinin təbliğatında ictimaiyyətin rolu”, Astara Rayon Mədəniyyət və Turizm şöbəsinin məsləhətçisi Əfqan Şəfiyev “Qeyri-maddi mədəni irsin muzeylər vasitəsilə təbliği” mövzusunda çıxış edib, müzakirələr aparacaqlar. Forum iştirakçıları Azərbaycanın müasir dekorativ tətbiqi sənət nümunələrindən ibarət “Ənənələr yaşayır” adlı sərgi ilə tanış olacaqlar. Forum sentyabrın 25-26-da Azərbaycan Milli İncəsənət Muzeyində öz işini davam etdirəcək.