Mədəniyyət siyasəti

Mədəniyyət siyasəti

Bakıda beynəlxalq forum keçirilir

24 sentyabr 2012 15:07 (UTC +04:00)

Bakı. Ülkər Rəşidqızı-APA. Bu gün Bakıda “Muzey icmaları və dövlət qurumları arasında qeyri-maddi mədəni irsin mühafizəsi və inkişafı üzrə əməkdaşlıq” mövzusunda beynəlxalq forum işə başlayıb. APA-nın məlumatına görə, forum Mədəniyyət və Turizm Nazirliyinin, “Azərbaycan Xalçaçıları” İctimai Birliyi və L.Kərimov adına Azərbaycan Xalçası və Xalq Tətbiqi Sənəti Dövlət Muzeyinin, UNESCO üzrə Azərbaycan Respublikasının Milli Komissiyasının, Beynəlxalq Muzeylər Şurasının (ICOM) Azərbaycan Milli Komitəsinin birgə təşkilatçılığı ilə keçirilir və sentyabrın 26-na kimi davam edəcək.

Tədbirdə Azərbaycan, Rusiya, Gürcüstan və Ukrayna ICOM milli komitələrinin nümayəndələri, həmçinin UNESCO-nun qeyri-maddi mədəni irs üzrə eksperti iştirak edirlər. Forumun məqsədi muzey icmasının və dövlət qurumlarının imkanlarının birləşdirilməsi üzrə qeyri-maddi mədəni irsin mühafizəsində və inkişafında əsas məsələlərin aşkar edilməsindən ibarətdir. Tədbir çərçivəsində Azərbaycanın UNESCO-ya üzv qəbul edilməsinin 20 illik yubileyi qeyd olunub. Forumun açılış mərasimində çıxış edən mədəniyyət və turizm nazirinin müavini Sevda Məmmədəliyeva bildirib ki, bu il Azərbaycan ilə UNESCO arasında əməkdaşlığın 20 illiyi tamam olur. S. Məmmədəliyeva bu illər ərzində görkəmli şəxsiyyətlərimizin yubileylərinin UNESCO səviyyəsində qeyd olunduğunu yada salıb. Tədbirdə UNESCO üzrə Azərbaycan Respublikasının Milli Komissiyasının birinci katibi Günay Əfəndiyevanın “Azərbaycan ilə UNESCO arasında 20 illik əməkdaşlığın nəticələri və perspektivləri” mövzusunda məruzəsi dinlənilib. ICOM Azərbaycan Milli Komitəsinin sədri, Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyinin direktoru Röya Tağıyevanın “Xalça ənənələrinin dirçəlişi”, Rusiya Mədəniyyət Nazirliyinin beynəlxalq mədəni əlaqələr departamentinin direktoru Yekaterina Seleznevanın “Qeyri-maddi mədəni irs”, ICOM Gürcüstan Milli Komitəsinin sədri İnqa Karayanın “Qeyri-maddi mədəni irsin qorunmasında və interpretasiyasında muzeylərin rolu”, Azərbaycan Musiqi Mədəniyyəti Dövlət Muzeyinin direktoru Alla Bayramovanın “Cəngin dirçəlişi”, Qobustan Milli Qoruğu Muzeyinin direktoru Məlahət Fərəcovanın “Qayalarda yazılanlar - Qobustan qoruğunun qayaüstü incəsənət abidələrinin təbliğatında ictimaiyyətin rolu”, Astara Rayon Mədəniyyət və Turizm Şöbəsinin məsləhətçisi Əfqan Şəfiyevin “Qeyri-maddi mədəni irsin muzeylər vasitəsilə təbliği” mövzusunda məruzələri dinlənilib, mövzular ətrafında müzakirələr aparılıb. Sonra forum iştirakçıları Azərbaycanın müasir dekorativ-tətbiqi sənət nümunələrindən ibarət “Ənənələr yaşayır” adlı sərgi ilə tanış olublar.

Sentyabrın 25-də forum Azərbaycan Milli İncəsənət Muzeyində işini davam etdirəcək.