Mədəniyyət siyasəti

Mədəniyyət siyasəti

Gəncədə Nizami Gəncəvi Beynəlxalq Mərkəzinin təməl qoyma mərasimi keçirilib

01 oktyabr 2012 08:23 (UTC +04:00)

Bakı. Ülkər Rəşidqızı-APA. Azərbaycan şairi və mütəfəkkiri Nizami Gəncəvinin vətəni Gəncədə böyük şairin təntənəli yubiley tədbirlərinə start verilib.

APA-nın məlumatına görə, Gəncədə yubiley tədbirləri Heydər Əliyevin abidəsini ziyarətlə başlayıb. Yubiley tədbiri dahi şairin məqbərəsi önündə davam etdirilib. Burada tədbir iştirakçılarını şərbətlə qarşılayan milli geyimli məktəblilər müxtəlif dillərdə dahi şairin əsərlərindən parçalar söyləyib, qonaqları qədim Azərbaycan rəqsləri ilə salamlayıblar. Sonra Nizami Gəncəvinin sözlərinə bəstələnmiş romanslar səsləndirilib. Minlərlə şəhər sakininin qatıldığı mərasimdə Azərbaycan baş nazirinin müavini Elçin Əfəndiyev, mədəniyyət və turizm naziri Əbülfəs Qarayev, Azərbaycan Milli Elmlər Akademiyasının prezidenti Mahmud Kərimov, təhsil naziri Misir Mərdanov, Azərbaycan Yazıçılar Birliyinin sədri Anar, Milli Məclisin deputatları, xarici ölkələrin Azərbaycandakı diplomatik korpuslarının nümayəndələri, 14 ölkədən dəvət olunmuş 150-dən artıq alim iştirak edib.

Baş nazirin müavini Elçin Əfəndiyev bu böyük bayram münasibətilə bütün gəncəliləri, eləcə də dahi Nizami yaradıcılığının işığına yığılan qonaqları təbrik edib. Elçin Əfəndiyev deyib ki, bu gün başlayan yubiley tədbirləri yalnız poeziya, mədəniyyət bayramı deyil: “Nizaminin yubileyi sözün əsl mənasında ümumxalq bayramıdır. Çünki 870 ildir ki, Nizaminin sənəti, onun özü Azərbaycan xalqı ilə birlikdədir. Nizami Gəncədə doğulub, Gəncədə yaşayıb və Gəncədə vəfat edib. Ancaq onun sənətinin, istedadının miqyası o qədər böyükdür ki, o, bütün bəşəriyyətin övladı oldu. Nizami nə qədər milli şairdirsə, o qədər də bəşəri şairdir. Nizami doğulduğu Gəncəni sənətkarlar diyarı adlandırır, özünü isə mahir sənətkar hesab edirdi. O, Gəncəni qədim Babillə müqayisə edirdi. Bu sözlər başqa bir dahi sənətkarın dilindən eşidilsəydi, bəlkə də bir qədər qeyri-təvazökar səslənərdi. Lakin Nizaminin dediyi bu sözlər son dərəcə təbii səslənir. Ona görə ki, Nizami istedadının böyük imkanları ilə Nizami sənətkarlığının iddiası tam şəkildə üst-üstə düşür”.

Mərasim başa çatdıqdan sonra qonaqlar və yubiley iştirakçıları dahi söz ustadının qəbrini ziyarət edərək məzarı üzərinə qızılgüllər qoyublar. Sonra məqbərə ətrafında Gəncə Dövlət Dram və Kukla teatrları aktyorlarının şairin "Sirlər xəzinəsi", "Xosrov və Şirin", "Leyli və Məcnun", "İsgəndərnamə" və "7 gözəl" əsərlərinin motivləri əsasında hazırladıqları ədəbi-bədii kompozisiyalar nümayiş etdirilib, Gəncə Dövlət Filarmoniyası və Dövlət Kamera Orkestrinin birləşmiş xorunun, eləcə də müğənnilərin ifasında Nizaminin sözlərinə bəstələnmiş romanslar səsləndirilib. Yubiley tədbirləri çərçivəsində Gəncənin mərkəzində Nizami Gəncəvi adına piyada keçidinin açılışı olub.

Azərbaycan Dövlət Aqrar Universitetində Nizami Gəncəvi irsinin təbliğində xidmətlərinə görə yubiley tədbirlərində iştirak etmək üçün gəlmiş bir qrup xarici elm xadiminə Azərbaycan Dövlət Aqrar və Gəncə Dövlət universitetlərinin fəxri doktoru adının verilməsi mərasimi keçirilib. Təhsil naziri Misir Mərdanov fəxri doktor adına layiq görülmüş qonaqları təbrik edib, bunu əlamətdar hadisə adlandırıb.

Daha sonra Xan bağında Nizami Gəncəvi Beynəlxalq Mərkəzinin təməl qoyma mərasimi keçirilib. Mərasimdə Gəncə Şəhər İcra Hakimiyyətinin başçısı Elmar Vəliyev, baş nazirin müavini Elçin Əfəndiyev, mədəniyyət və turizm naziri Əbülfəs Qarayev və Azərbaycan Yazıçılar Birliyinin sədri Anar iştirak edib. Təməlqoyma mərasimindən sonra Heydər Əliyev Mərkəzində Nizami Gəncəvinin poemalarının yeni tərcümə və tərtibatda nəşr olunmuş nüsxələrinin təqdimatı keçirilib.