Bakıda III Belarus-Azərbaycan İKT Forumu keçiriləcək

Bakıda III Belarus-Azərbaycan İKT Forumu keçiriləcək
# 22 sentyabr 2015 12:03 (UTC +04:00)

Bakı. Vüsal Nəbiyev - APA-Economics. Rabitə və yüksək texnologiyalar naziri Əli Abbasov Belarusun ölkəmizə yeni təyin olunan səfiri Gennadi Axramoviç ilə görüşüb.

Nazirlikdən “APA-Economics”ə verilən məlumata görə, hər iki ölkə arasında səmimi dostluq və qarşılıqlı etimada əsaslanan münasibətlərin əməkdaşlığın bütün istiqamətlərinə, o cümlədən rabitə və yüksək texnologiyalar sahəsinə də dərindən nüfuz etdiyini deyən Ə.Abbasov bu əlaqələrin inkişafında hər iki tərəfin yaxından iştirak etdiyini nəzərə çatdırıb.

Nazir İKT, rabitə və yüksək texnologiyalar arasında mövcud fəaliyyətin dərinləşdirilməsi üçün böyük potensialın olduğunu qeyd edərək, bu sahədə gələcək əməkdaşlığa dair maraq göstərilən sahələrdən söz açıb.

G. Axramoviçin səfir postuna təyinatı ilə bağlı təbriklərini də çatdıran nazir yeni diplomatın qarşıdakı fəaliyyəti dövründə ölkələr arasında dinamik inkişafa töhfə verəcəyinə əminliyini vurğulayıb.

Xalqlarımızı birləşdirən ortaq maraq və dəyərlərdən söz açan səfir də bu münasibətlərin qorunub saxlanılmasını hər iki tərəfin böyük iradəsinin nəticəsi kimi dəyərləndirib.

Diplomat gələcək fəaliyyəti çərçivəsində İKT, rabitə və yüksək texnologiyalar sahəsində yeni əməkdaşlıq formalarının müəyyənləşdirilməsi, genişləndirilməsi və inkişafı istiqamətində səylərini əsirgəməyəcəyini vurğulayıb.

Görüşdə “Bakutel-2015” sərgi-konfransında milli stendlə çıxış edəcək Belarusun 15-ə yaxın şirkətlə təmsil olunacağı, həmçinin sərgi çərçivəsində yüksək texnologiyalar üzrə III “Belarus-Azərbaycan İKT Forumu”nun keçiriləcəyi də qeyd olunub.

#
#

ƏMƏLİYYAT İCRA OLUNUR