Moskva. Fərid Əkbərov – APA. “Rusiya ilə Azərbaycan arasında hərbi-texniki sahədə mövcud olan əməkdaşlığı müsbət qiymətləndirirəm”.
Bunu APA-nın Moskva müxbirinə açıqlamasında Rusiya Federasiyası müdafiə nazirinin müavini Anatoli Antonov deyib. O bildirib ki, iki ölkə arasında münasibətlər yüksək səviyyədədir: “Biz qarşılıqlı əməkdaşlığın inkişaf etdirilməsinin tərəfdarıyıq. Rusiya hərbi-texniki sahədə əməkdaşlıq yolunda heç bir problem görmür”.
Bu gün keçirilən IV Moskva Beynəlxalq Təhlükəsizlik Konfransından danışan nazir müavini Azərbaycanın bu konfransda iştirakını yüksək qiymətləndirib: “Konfransa 80-ə yaxın ölkədən nümayəndə heyətləri qatılıb. O cümlədən, NATO ölkələrindən. Konfrans iştirakçıları “İslam Dövləti” terrorçu qruplaşmasının yaratdığı təhlükələr, eləcə də Avropada təhlükəsizlik mexanizmlərini müzakirə ediblər. Azərbaycan da artıq dördüncü dəfədir keçirilən beynəlxalq təhlükəsizlik konfransında iştirak edir”.