Bakı - APA. İyunun 22-də Fövqəladə Hallar Nazirliyində (FHN) Azərbaycanda səfərdə olan Avstriya Respublikası Federal Daxili İşlər Nazirliyinin (DİN) ekspertləri ilə görüş keçirilib.
FHN-in mətbuat xidmətindən APA-ya verilən məlumata görə, fövqəladə hallar nazirinin müavini, general-leytenant Etibar Mirzəyev ölkədə fövqəladə halların qarşısının alınması və nəticələrinin aradan qaldırılması sahəsində görülən işlər haqqında ətraflı məlumat verib, nazirliyin nümayəndə heyətlərinin müxtəlif illərdə Avstriyaya səfərləri, o cümlədən İnsbruk şəhərində keçirilmiş təlimlərdə iştirakını xatırladıb.
O, qarşılıqlı səfərlərin ikitərəfli əlaqələrə mühüm töhfə verdiyini vurğulayıb və FHN üçün Avstriyanın müvafiq qurumlarının təcrübəsinin maraqlı olduğunu bildirib.
Avstriya DİN-in xüsusi əməliyyat eksperti, polkovnik Hans Ebner Azərbaycanda olduqları müddətdə yanğından mühafizə, axtarış-xilasetmə üzrə azərbaycanlı həmkarları ilə geniş təcrübə mübadiləsi aparılacağını söyləyib.
Görüşdən sonra qonaqlar FHN-in Böhran Vəziyyətlərində İdarəetmə Mərkəzinin Böhranların idarə edilməsi zalı və Əməliyyat zalı ilə tanış olublar.
Səfər çərçivəsində avstriyalı ekspertlər iyunun 26-dək FHN-in qurumlarında olacaq, həmçinin, FHN Akademiyasında seminar keçirəcəklər.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
