Sentyabrın 15-də Qarabağda yeni tədris ilinin başlanması – Bilik Günü münasibətilə ümumtəhsil məktəblərində tədbirlər keçirilib.
APA-nın Qarabağ bürosu xəbər verir ki, Kəlbəcər şəhərində Bəhmən Cəfərov adına 1 nömrəli tam orta məktəbdə keçirilən tədbirdə ilk dərs günü böyük sevinc və həyəcanla qarşılanıb. Bu il məktəbdə 121 şagird Kəlbəcərdə təhsilini davam etdirəcək.
Xankəndi şəhəri, Xocalı və Ağdərə rayonlarında da Bilik Günü ilə bağlı tədbirlər təşkil olunub.
Nizami Gəncəvi adına Xankəndi şəhər 4 nömrəli tam orta məktəbdə bu il birinci sinfə 110 şagird qəbul edilib. Hazırda məktəbdə 1052 şagird təhsil alır.
Xankəndi şəhərinin Kərkicahan qəsəbəsindəki 1 nömrəli tam orta məktəbdə də ilk dərs günü qeyd olunub. Hazırda məktəbdə 323 şagird təhsil alır, bu il birinci sinfə 14 şagird qəbul edilib.
Xocalı şəhər 1 nömrəli tam orta məktəbdə 248 şagird təhsil alır. Onlardan 11-i bu il birinci sinfə qədəm qoyub. Xocalı rayonunun Ballıca kənd tam orta məktəbində isə 192 şagird təhsil alır, bu il 11 şagird birinci sinfə qəbul olunub.
Ağdərə rayonunun Suqovuşan kənd tam orta məktəbində 87 şagird təhsil alır və bu il 14 şagird birinci sinfə başlayıb. Vəngli kənd tam orta məktəbində 93 şagird təhsil alır, onlardan 4-ü bu il birinci sinfə gedib. Həsənriz kənd tam orta məktəbində isə 159 şagird təhsil alır və bu il 15 şagird birinci sinfə qəbul olunub.
Beləliklə, Xankəndi, Xocalı və Ağdərə rayonlarında bu il ümumilikdə 179 şagird birinci sinfə başlayıb.
Bilik Günü ilə bağlı tədbirlərdə şagird və tələbələrə yeni tədris ilində uğurlar arzulanıb, təhsilin Qarabağın gələcək inkişafında mühüm rol oynadığı vurğulanıb.
Qeyd edək ki, hazırda Qarabağ Universitetində 3 330-dan çox tələbə təhsil alır. Qarabağ Universitetində yeni tədris ilinin başlanması ilə əlaqədar tədbirdə tələbələrə təhsildə uğurlar arzulanıb.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
