Sənaye və energetika

Ana səhifə

Naxçıvanda taxıl biçini başa çatıb

07 avqust 2008 11:55 (UTC +04:00)

Naxçıvan. C. Qurbanoğlu – APA. Naxçıvan Muxtar Respublikasında (MR) taxıl biçini başa çatıb. MR Kənd Təsərrüfatı Nazirliyindən APA-ya verilən məlumata görə, 33 min 441 hektar sahədə biçin aparılıb, 82 min 564 ton məhsul yığılıb. Bunun 74 min 667 tonu buğda, 7 min 897 tonu arpadır. Ötən illə müqayisədə buğda istehsalı 16 min 731 ton artıb. Nazirlikdə hesab edirlər ki, istehsal olunan məhsul MR-in buğdaya tələbatını tam ödəyəcək. «Nəzərə alsaq ki, buğdaya olan illik tələbat 67 min tondur, istehsal olunan məhsul daxili bazarı çörək və un məmulatları ilə tam təmin etməyə imkan verəcək»-deyə - nazirlikdən bildirilib. Artıq qalan məhsuldan isə ehtiyat taxıl fondu yaradılmasında istifadə olunması nəzərdə tutulur.

Qeyd edək ki, ötən illə müqayisədə, bu il MR-də taxıl sahələrinin həcmi 9 min 453 hektar artıb. Taxıl əkilmiş sahənin 30 min 50 hektarı buğda, 3 min 391 hektarı arpa olub. Taxıl istehsalını artırmaq məqsədilə bu il ilk dəfə olaraq MR-in müəssisə və təşkilatları tərəfindən 5 min 605 hektar sahədə taxıl əkilib. Bunun 4 min 368 hektarını buğda təşkil edir. Buğda istehsalı ilə əlaqədar cari il ərzində Naxçıvan MR-də fəaliyyət göstərən müəssisə və təşkilatlara 174 min 720 manat həcmində kredit və 476 ton gübrə verilib.

Əlavə edək ki, Naxçıvanda taxıl fondu yaradılması məqsədilə Naxçıvan şəhərinin Əliabad yaşayış məntəqəsində ümumi tutumu 38 000 ton olan taxıl anbarları inşa olunur. Həmin anbarlarda taxıl məhsullarının 18 000 tonunun uzunmüddətli, 20 000 tonunun isə qısamüddətli saxlanılması təmin ediləcək.

Naxçıvan_taxıl