Sənaye və energetika

Ana səhifə

300 MVt-lıq Səngəçal modul tipli elektrik stansiyası bu ilin sonadək istifadəyə veriləcək

12 avqust 2008 13:51 (UTC +04:00)

Bakı. Rəşad Süleymanov – APA-Economics. Bakı yaxınlığında inşa edilən 300 MVt-lıq Səngəçal modul tipli elektrik stansiyasının bu ilin sonlarınadək istifadəyə verilməsi planlaşdırılır. Bu barədə «APA-Economics»ə «Azərenerji» ASC-nin mətbuat xidmətindən stansiyanın direktoru Nazir Əsədova istinadən məlumat verilib.

N. Əsədov bildirib ki, indiyədək stansiya ərazisinə 11 ədəd mühərrik gətirilib (stansiyada 18 ədəd mühərrik quraşdırılacaq). Hazırda bu aqreqatlar (3 aqreqat cari ilin mart ayında quraşdırılıb və sınaq sazlama işləri aparılıb) quraşdırılır. Digər 7 aqreqatın ölkəyə gətirilməsi isə avqustun sonu, sentyabrın əvvəllərinə gözlənilir.
Bundan əlavə, stansiya ərazisində inşa edilən 110 KV-luq yarımstansiya da sistemə qoşulmaq üçün hazırlıq vəziyyətinə gətirilib. Artıq yarımstansiyada 220 KV-luq “Səngəçal” yarımstansiyasından gərginlik verilərək sınaqdan çıxarılıb.

Qeyd edək ki, yanvar ayından başlayaraq buradan “Puta” yarımstansiyasına elektrik enerjisi ötürülür. Hazırda stansiya ərazisində ehtiyat mazut çənlərinin quraşdırılması istiqamətində işlər aparılır. Burada ümumi həcmi 18 min ton təşkil edən 3 mazut çəni quraşdırılacaq. Onlardan birinin tutumu 3 min ton, digər çənlərin hər birininki isə 7,5 min ton təşkil edəcək.

Xatırladaq ki, Azərbaycanda 2006-cı ildən indiyədək ümumi gücü 450 MVt təşkil edən 5 modul tipli elektrik stansiyası tikilərək istifadəyə verilib. Hazırda Səngəçalda 300, Qubada isə 104 MVt gücündə elektrik stansiyalarının tikintisi davam etdirilir.

«Azərenerji»