Sənaye və energetika

Ana səhifə

BP şirkəti Transxəzər boru kəmərinin inşası layihəsindən imtina edir

20 oktyabr 2008 14:54 (UTC +04:00)

Bakı. Vahab Rzayev – APA-Economics. Transxəzər boru kəmərin inşası layihəsinin iştirakçılarının sayı azalır. «APA-Economics»in məlumatına görə, BP şirkəti Transxəzər Boru Kəməri Konsorsiumda (TBKK) payını satmaq məqsədi ilə apardığı danışıqların yaxın vaxtlarda başa çatacağını bəyan edib. BP şirkətinə məxsus 500-700 mln. dollar dəyərində səhm zərfinin alınmasına «LUKoil» şirkəti maraq göstərir.
Qeyd edək ki, Konsorsiumun iştirakçıları siyahısında əsas pay Rusiyaya məxsusdur. Belə ki, Rusiyanın «Transneft» şirkəti 24%, Qazaxıstan dövləti 19%, Oman 7% paya malikdir. Qalan 50% isə özəl investorlara, o cümlədən BP, «LUKoil», «Chevron», «ExxonMobil», «Rosneft» şirkətlərinə məxsusdur.
BP-dən başqa Oman hökuməti də TBKK-da öz payını satmaq arzsunda olduğunu bildirib. Bu payın Rusiya və ya Qazaxıstan tərəfindən alınacağı gözlənilir.
Mütəxəssislərin fikrincə, investorların bu addımları layihənin zərərli olması ilə bağlıdır. Bu da öz növbəsində layihənin bahalaşması ilə əlaqələndirilir ki, boru kəmərinin illik buraxılış gücünün 32 mln. tondan 67 mln. tona qədər genişləndirilməsi planlaşdırılır və bu, layihənin dəyərini 2,5 mlrd. dollardan 3,5 mlrd. dollara qədər bahalaşdırıb.
Qeyd edək ki, 2009-cu ilin sonuna kimi layihənin texniki-iqtisadi əsaslandırmasının tam hazırlanması, 2010-cu ildə inşasına başlanması, 2011-ci ildə genişlənmənin birinci mərhələsinin həyata keçirilməsi, 2012-ci ildə ikinci mərhələsinin həyata keçirilməsi və 2013-cü ildə kəmərin tam güclə işə salınması nəzərdə tutulur.
Analitiklərin fikrincə, BP-nin və Omanın paylarının alınması üçün Rusiyanın özəl investorlarının iqtisadi əsasları yoxdur və əgər bu baş verərsə, həmin qərar siyasi xarakter daşıyacaq.
Vurğulayaq ki, BP şirkəti layihənin genişləndirilməsinin əleyhinə olub.
Xatırladaq ki, Rusiyanın təşəbbüsü ilə həyata keçirilən bu layihə Qazaxıstan neftinin Novorossiysk limanına (Qara dəniz) nəqlini nəzərdə tutur.